Վերջերս ՆԱՏՕ-ին միացած Ֆինլանդիայի նախագահ Ալեքսանդր Ստուբը բրիտանական Financial Times պարբերականին տված հարցազրույցում Հյուսիսատլանտյան ռազական դաշինքին կոչ է արել պատրաստվելու Ռուսաստանի հետ հնարավոր հակամարտությանը, թեև դա քիչ հավանական է համարում: Մինչդեռ Մոսկվան բազմիցս հայտարարել է, որ մտադիր չէ ՆԱՏՕ-ի հետ մտնել հակամարտության մեջ:

Ստուբը ՆԱՏՕ-ի մյուս երկրների ղեկավարներին հորդորել է Ռուսաստանի դեմ իրենց հռետորաբանությունը «ռազմաշունչ» դարձնելու փոխարեն սեփական բանակները նախապատրաստել հնարավոր հակամարտության:

Ֆինլանդիայի նախագահը նշել է, որ «Ռուսաստանի կողմից սպառնացող վտանգի» վերաբերյալ վերջին հրապարակային նախազգուշացումները շեղում են եվրոպական երկրների ուշադրությունը Կիևին օգնելու և իրենց զինվորականներին պատրաստելու գործից:

Ըստ պարբերականի՝ Ստուբը չի հավատում, որ Մոսկվան մինչև 2030 թվականը կհարձակվի ՆԱՏՕ-ի որևէ երկրի վրա։ Ռուսաստանի Դաշնությունը բազմիցս հերքել է նման մեղադրանքները։

Ստուբը եվրոպական երկրներին հորդորել է «ավելի ֆիննավարի» մտածել: «Այսինքն՝ ավելի պատրաստված։ Մենք պետք է պատրաստվենք վատթարագույնին, որպեսզի խուսափենք դրանից»,- հավելել է նախագահը։

Եվրոպական մյուս երկրների դիտարկելիք միջոցառումների թվում Ստուբը նշել է ռազմական զորակոչը, որը պարտադիր է Ֆինլանդիայում: Նա նաև ՆԱՏՕ-ի երկրներին կոչ է արել աջակցելու Ուկրաինային «ամեն գնով»՝ նշելով, որ Ֆինլանդիան հանուն այդ աջակցության դատարկում է զինամթերքի «սեփական պահեստարանները» և հետո միայն կհամալրի դրանք։

Ֆինլանդիայի նախագահը շեշտել է, որ երկրին չի մտահոգվում Ֆինլանդիայի սահմանի երկայնքով իր ներկայությունն ավելացնելու՝ Ռուսաստանի ծրագրերով։ «Մենք չենք անհանգստանում այդ ամենից, բայց պատրաստ ենք դրան»,- ասել է Ստուբը:

Ֆինլանդիան Հյուսիսատլանտյան դաշինքին միացել է 2023 թվականի ապրիլի 4-ին։