Եվրամիությունը մինչեւ 2027թ. 1 մլրդ եվրո կհատկացնի Լիբանանին բարեփոխումների եւ միգրացիայի դեմ պայքարի պայմանով։ Այս մասին հայտնել է Եվրահանձնաժողովի նախագահ Ուրսուլա ֆոն դեր Լյայենը Լիբանանում կայացած մամուլի ասուլիսում, որն օնլայն հեռարձակել է Եվրահանձնաժողովի մամուլի ծառայությունը։
«Մեր աջակցությունն ընդգծելու համար ես հայտարարում եմ Լիբանանին 1 մլրդ եվրոյի օգնություն տրամադրելու մասին, որը կսկսվի այս տարի եւ կշարունակվի մինչեւ 2027թ.»,- ասել է նա։
Նա նշել է, որ ծրագիրը տրամադրվում է կրթության, բանկային հատվածի, զինված ուժերի եւ անվտանգության ուժերի, եւ որ գլխավորն է՝ միգրացիայի դեմ պայքարի ոլորտում բարեփոխումներ իրականացնելու համար։
«Մենք կաջակցենք երկրի զինված ուժերին եւ ներքին անվտանգության ուժերին։ Շատ կարեւոր է, որպեսզի Լիբանանը հարաբերություններ հաստատի Frontex-ի [ԵՄ սահմանների պահպանության գործակալության] հետ՝ Եվրոպա փախստականների լեգալ անցման եւ անլեգալ միգրացիայի դեմ պայքարի նպատակով»։
Նա նաեւ ողջունել է Լիբանանի դերը սիրիացի փախստականներին ընդունելու գործում եւ կողմ է փախստականների տուն վերադարձի ծրագրերի աջակցմանը։
Մամուլի ասուլիսի ժամանակ լրագրողներին Եվրահանձնաժողովի նախագահին հարցեր ուղղելու հնարավորություն չի տրվել։
ԵՄ-ն 2023թ. նորից բախվել է Եվրոպա թափանցող ռեկորդային թվով անլեգալ միգրանտների խնդրին, այն մոտեցել է 2015-2016թթ. միգրացիոն ճգնաժամի մակարդակին, երբ մեկ տարվա ընթացքում ԵՄ էր եկել ավելի քան մեկ միլիոն միգրանտ Աֆրիկայի եւ Ասիայի երկրներից։