Ավտոմեքենաների արտադրող Audi-ն ներկայացրել է Q3 Sportback-ի նոր տարբերակը, որը ոճային կուպե-քրոսովեր մոդելի երկրորդ սերունդն է, հաղորդում է Autocar-ը։

Այս տարբերակը կառուցված է նույն տեխնիկական հիմքի վրա, ինչ վերջերս թողարկված երրորդ Q3 SUV-ը, և տարբերվում է միայն թեք տանիքով, որը իջեցված է 29 մմ-ով, ինչը մեքենային ավելի սպորտային ուրվագիծ էհաղորդում։

Զարմանալիորեն այն չի ազդել բեռնախցիկի ծավալի վրա. այն մնացել է նույնը՝ 488 լիտր։

Q3 Sportback-ի նոր տեսքը կտրուկ տարբերվում է նախորդ մոդելից։ Ավտոմեքենան ստացել է թարմացված լուսատու տարրեր՝ նոր A6 Avant-ի ոճով, ներառյալ բարակ լուսադիոդային առջևի լուսարձակները և հետևի լուսային վահանակը, ինչպես նաև հետևի հատվածում լուսավորվող Audi-ի լոգոն։

Ինտերիերը ևս թարմացվել է. տեղադրվել են 12,8 դյույմանոց սենսորային մուլտիմեդիոն էկրան և 11,9 դյույմանոց թվային վահանակ։

Audi-ն հրաժարվել է սովորական լծակներից՝ հօգուտ ղեկի հետ համատեղված կառավարման նոր բլոկային վահանակի, որի վրա այժմ կենտրոնացված են շարժման ռեժիմները, լույսը, մաքրիչները և շրջադարձի ազդանշանները փոխելու գործառույթները։ Վահանակը շարժվում է օգտագործման ընթացքում՝ նմանակելով ավանդական ընտրիչի աշխատանքը։

Դրա պատճառով փոխանցման տուփի սելեկտորը հանվել է կենտրոնական մասից՝ տեղ ազատելով երկու բաժակակալի և հեռախոսի անլար լիցքավորիչի համար։

Q3 Sportback-ի նոր սերունդը կառուցված է MQB հարթակի վրա, որն օգտագործվում է նաև Audi A3-ի և Volkswagen Golf-ի համար։ Այն առաջարկում է էներգաբլոկի երեք տարբերակ՝ բենզինային 148 ձիաուժ հզորությամբ և մեղմ հիբրիդային տեխնոլոգիայով, դիզելային՝ 148 ձիաուժով և ամենահզոր՝ միացվող հիբրիդային (E-hybrid) տարբերակը՝ 268 ձիաուժով, որը կարող է էլեկտրականությամբ անցնել մինչև 73 մղոն (մոտ 117 կիլոմետր)։ Վերջինս 2 մղոնով պակաս է, քան Q3 SUV-ի ցուցանիշը։

Նոր Q3 Sportback-ի վաճառքը կսկսվի հոկտեմբերին՝ Q3 SUV-ի թողարկումից մոտ մեկ ամիս անց։