Ապրիլի 28-ին ՆԳՆ ոստիկանության Լոռու մարզի օպերատիվ կառավարման կենտրոն մարզի դատաբժշկական փորձաքննությունների բաժնից հաղորդում էր ստացվել, որ «Վանաձոր» բժշկական կենտրոնից իրենց մոտ է տեղափոխվել Վանաձոր քաղաքի բնակիչ 1941 թ. ծնված Մարսիկ Հ.-ի դիակը:
Հաղորդվել էր նաև, որ դիակի վրա առկա է գանգուղեղային վնասվածք, ինչի վերաբերյալ մահացածի 56-ամյա որդին հայտնել էր, որ մայրը ապրիլի 20-ին տանն ընկել է՝ ստանալով նշված վնասվածքը:
Ոստիկանության Տարոնի բաժնում փաստով կազմված փաստաթղթերն ուղարկվել էին Լոռու մարզային քննչական վարչություն: Նախաձեռնվել էր քրեական վարույթ:
Մայիսի 6-ին ոստիկանության Տարոնի բաժնի և Լոռու մարզի քննչական վարչության ծառայողների համատեղ ձեռնարկած օպերատիվ-քննչական միջոցառումների արդյունքում պարզվել է, որ 83-ամյա մոր հետ համատեղ բնակվող 56-ամյա որդին ապրիլի 19-ի գիշերը բութ կոշտ գործիքով դիտավորությամբ հարվածներ է հասցրել մոր մարմնի տարբեր մասերին, այդ թվում՝ կյանքի համար կենսական կարևորագույն օրգան համարվող գլխին, ինչի հետևանքով ապրիլի 28-ին նա հիվանդանոցում, գիտակցության չգալով, մահացել էր:
56-ամյա տղամարդը կալանավորվել է: Քրեական վարույթը շարունակվում է:
