ՌԴ նախագահի մամուլի քարտուղար Դմիտրի Պեսկովը անչափ վտանգավոր միտում է որակել ուկրաինական հակամարտությանն անմիջական միջամտության չբացառման մասին եվրոպացի քաղաքական գործիչների շարունակական հայտարարությունները։ «Մենք նման բանավոր սրացում ենք տեսնում պաշտոնական ներկայացուցիչների, պետությունների ղեկավարների մակարդակով՝ երբ դա առնչվում է Ֆրանսիային, ավելի փորձագիտական մակարդակում՝ երբ դա առնչվում է Մեծ Բրիտանիային»,- ասել է ՌԴ առաջնորդի մամուլի քարտուղարը։
Ֆրանսիայի նախագահ Էմանուել Մակրոնը The Economist-ին տված հարցազրույցում հայտարարել է, որ չի բացառում Ուկրաինա զորք ուղարկելու հնարավորությունը, եթե Ռուսաստանը ճեղքի առաջնագիծը, և Կիևը դիմի օգնության խնդրանքով։ Ըստ Պեսկովի՝ ԵՄ շատ երկրներ համաձայնել են զորքերի հնարավոր տեղակայման վերաբերյալ Ֆրանսիայի մոտեցմանը։
«Ֆրանսիան՝ ի դեմս պետության ղեկավարի, շարունակում է մշտապես խոսել Ուկրաինայի շուրջ հակամարտությունում գետնի վրա իր անմիջական մասնակցության հնարավորության մասին։ Սա շատ վտանգավոր միտում է։ Մենք ուշադիր հետևում ենք դրան»,- ընդգծել է Կրեմլի պաշտոնական ներկայացուցիչը։
