Հայաստանում 2018թ. իշխանության հանձնում է տեղի ունեցել։ Այս մասին NEWS.am-ի թղթակցի հետ զրույցում ասել է քաղաքագետ Ալեն Ղեւոնդյանը։

Նա վստահություն է հայտնել, որ այն ժամանակ իշխանությունը Հայաստանում շատ ուժեղ էր, եւ նա կարող էր լուծել բոլոր խնդիրները դեռ սաղմնային վիճակում։ «Այդ մարդուն (Փաշինյանին- խմբ.) պատրաստում էին»,- նշել է փորձագետը։

Նա նշել է, որ 2021թ., երբ տեղի ունեցան արտահերթ խորհրդարանական ընտրությունները, Հայաստանի ազդեցիկ քաղաքական ուժերից մեկը բացահայտ պաշտպանում էր գործող վարչապետին մեկ այլ ընդդիմադիր թեկնածուի դեմ։ «Ես գիտեմ, թե ինչպիսին կլինի արձագանքն իմ խոսքերից հետո։ Այս մասին համարյա թե շշուկով են խոսում»,- ավելացրել է Ղեւոնդյանը։

Նա ընդգծել է, որ ընդդիմության զգալի մասն ասում է. «Ինչո՞ւ Ռուսաստանը Հայաստանում չի փոխում իշխանությունը եւ այն մեզ չի հանձնում»։ «Իշխանությունների այլընտրանքային օրակարգ ձեւավորելու համար պետք է տեղի ունենա քաղաքական ուժերի համախմբում։ Վարչապետին իշխանությունից զրկելը դժվար խնդիր չէ, բայց փողոցային պայքարի ճանապարհով դա անելը դժվար կլինի, քանի որ նա (Փաշինյանը- խմբ.) լավ է տիրապետում այդ տեխնոլոգիաներին, ունի ուժային ռեսուրս եւ արտաքին աջակցություն՝ գյուղերի հանձնման խոստման ֆոնին»,- նշել է փորձագետը։

Նա բացատրել է, որ իշխանափոխության համար հարկավոր են ավելի արդյունավետ միջոցներ, քան փողոցային պայքարն է։