Ռուսաստանի արտաքին գործերի նախարարությունը ապրիլի 23-ին կայացած «Հարավային Կովկասում ռուսական շահերի խթանման մասին» թեմայով ԱԳՆ կոլեգիայի նիստից հետո հայտարարություն է տարածել։
ՌԴ ԱԳՆ-ի հաղորդմամբ՝ հանդիպման ընթացքում ընդգծվել է, որ «Ռուսաստանին ռազմավարական պարտություն պատճառելու» համար «Հավաքական Արևմուտքը, Ուկրաինայից հետո, ձգտում է ապակայունացնել իրավիճակը հետխորհրդային տարածքի այլ հատվածներում, այդ թվում՝ Հարավային Կովկասում, խարխլելու Ռուսաստանին տարածաշրջանի երկրների հետ կապող դաշինքային և գործընկերային հարաբերությունները, ոչնչացնելու հավաքական անվտանգության և տնտեսական գործընկերության գոյություն ունեցող մեխանիզմները»։
«Նշվում է, որ, ի տարբերություն արևմտյանների, որոնք առաջնորդվում են բացառապես «զրոյական գումարով խաղերի» տրամաբանությամբ, Ռուսաստանի համար առաջնահերթությունը միշտ եղել և մնում է Հարավային Կովկասում կայունության, անվտանգության և բարգավաճման ապահովումը։ Ռուսաստանը կշարունակի զարգացնել փոխադարձ հարգալից և փոխշահավետ համագործակցություն տարածաշրջանի բոլոր պետությունների հետ, որոնց հետ մեզ միավորում է ընդհանուր դարավոր պատմությունը, աշխարհագրական մերձությունը և սերտ մարդկային շփումները»,- ասված է ՌԴ ԱԳՆ հայտարարության մեջ։
Նշվում է, որ անհրաժեշտ է շարունակել հասնել Ադրբեջանի, Հայաստանի և Ռուսաստանի միջև եռակողմ համաձայնագրերի ամբողջական իրականացմանը, ներառյալ Բաքվի և Երևանի միջև խաղաղության պայմանագրի համաձայնեցումը, տարածաշրջանում տրանսպորտային հաղորդակցությունների ապաշրջափակումը և հայ-ադրբեջանական սահմանի սահմանազատումը։ Աբխազիայի, Վրաստանի և Հարավային Օսիայի մասնակցությամբ Անդրկովկասի վերաբերյալ Ժնևյան միջազգային քննարկումների շրջանակներում Ռուսաստանը կշարունակի աշխատել ուժի չկիրառման վերաբերյալ հուսալի համաձայնությունների ձեռքբերման ուղղությամբ։
«Քննարկվել են տարածաշրջանի կապի և ինքնաբավության ամրապնդման խնդիրները՝ ի շահ իր առջեւ ծառացած խնդիրների լուծման, առաջին հերթին հենց իրենք՝ տարածաշրջանի ղեկավարների ջանքերով, առանց արտաքին միջամտության։ Այս համատեքստում ընդգծվել է «3+3» խորհրդատվական տարածաշրջանային պլատֆորմի (Ադրբեջան, Հայաստան, Վրաստան գումարած Իրան, Ռուսաստան, Թուրքիա) ներուժի օգտագործման առանձնահատուկ նշանակությունը։ Այս ուղղությամբ նախանշվել են գործնական քայլեր»,- նշվում է զեկույցում։
