Տավուշի նկատմամբ ադրբեջանական վտանգի դեմն առնելու ելքը պատերազմն է, ուրիշ ոչ մի բան: Այս մասին այսօր՝ ապրիլի 23-ին, հայտարարեց Երեւան-Սեւան մայրուղին փակած քաղաքացիներից մեկը:
«Պատերազմով հայ ժողովրդին հնարավոր չէ վախեցնել: Մենք պատերազմից չենք վախեցել ու չենք վախենում: Եթե մեռնել, թող մեռնենք, բայց պատերազմել պետք է»,-ասաց նա:
Ակցիայի մեկ այլ մասնակից էլ ասաց. «Մեր թշնամին Փաշինյանն է: Ինքը հողերը հանձնել է, բանակը թուլացրել է, ես վստահ եմ, որ փող էլ է ստացել, որ հանձնի: Ամեն օր մի նոր բան է մտածում, ստորացնում է, ծաղրում է ժողովրդին, տեռորի է ենթարկում ժողովրդին ամեն օր: Մեր ժողովուրդը արժանի չէ պետականություն ունենալու, որովհետեւ 6 տարի հանդուրժում է նրան իշխանության ղեկին»:
Նշենք, որ շուրջ մեկ ժամ մայրուղին փակ պահելուց հետո ճանապարհը բացվեց: Ակցիայի մասնակիցները նշեցին, որ մարդիկ կան, որ պետք է գնան եւ մասնակցեն Երեւանում ջահերով երթին:
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան արձանագրություն-նկարագրությամբ, ինչը կողմերի միջև պետք է համաձայնեցվի ու ստորագրվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` սահմանազատման հետ կապված և անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
