Երեկ վարչապետի հետ հանդիպմանը տավուշցի գյուղապետերին ասել են, որ ոչ մի բան էլ չի փոխվում, դեռ մի բան էլ ավելի վատ է լինելու, այսինքն՝ ամբողջական հանձնում է լինելու, փուլային, բայց շատ արագ՝ օրերի, շաբաթների ընթացքում: Այս մասին այսօր՝ ապրիլի 23-ին, լրագրողների հետ զրույցում ասաց «Ժողովրդավարական համախմբում» կուսակցության նախագահ, քաղաքագետ Սուրեն Պետրոսյանը։
«Ասել են՝ հանձնումն անկասելի է: Դա իրենց կարծիքն է, որ անկասելի է: Իսկ թե իրականում անկասելի է, թե ոչ, կապրենք, կտեսնենք: Իշխանությունը փորձել է բոլորին փաստի առաջ կանգնեցնել՝ դրանով զրկելով ժամանակից, որ ինքնակազմակերպվեն կամ գործողություն անեն, բայց մի քանի օր սպասեք, կտեսնեք՝ ով է ում փաստի առաջ կանգնեցրել»,-ասաց Պետրոսյանը։
Նրա խոսքով, գյուղապետերն ազնիվ ու հայրենասեր մարդիկ են եւ չեն պատկերացրել, որ ինչ-որ մեկը կարող է նայել իրենց աչքերին, խոստանա, երդվի բոլոր սրբություններով ու հաջորդ օրը հակառակ բանն անի. «Այդ մարդիկ իրենց կյանքում այդպիսի էակներ չեն տեսել, նրանց դժվար է համոզել, որ այդպիսի բան հնարավոր է: Սա է ամբողջ խնդիրը»:
