Իրականում եթե 2021 թվականին կազմակերպեինք արտահերթ լսումներ կամ նիստ՝ սահմանազատման և սահմանագծման գործընթացին օրինական ընթացք տալու վերաբերյալ և եթե այն ժամանակ ադրբեջանական օկուպացիոն գործողությունների արդյունքում անօրինական սահմանագծում չիրականացվեր, ապա այսօր մենք չէինք կանգնի այս ամենի առաջ, երբ ադրբեջանն առանց սահմանագծում, սահմանազատում է իրականացնում արդեն մեր իսկ ուժերով, ՀՀ կառավարության ղեկավարի համաձայնությամբ: Այս մասին այսօր՝ մայիսի 3-ին, ԱԺ նիստում հայտարարեց ԱԺ «Հայաստան» խմբակցության ղեկավար Սեյրան Օհանյանը
Նա ասաց, որ այսօր խախտվում են և սահմանազատման և սահմանագծման ընթացակարգերը, հերթականությունը և այն սկզբունքները, որոնք արտահայտված են միջազգային նորմերին համաձայն ԵԱՀԿ համապատասխան փաստաթղթում։
«Եթե այսօր այս հերթականությամբ, այս իրականությամբ դուք իրականացնեք սահմանազատում և սահմանագծում, ապա հետագայում դուք ձեր արմունկներն եք կրծելու, որովհետև Խորհրդային Միության ժամանակ այն սահմանները, որոնք որ ձևավորվել են, իրատեսական չեն և չեն համապատասխանում աշխարհագրական բնական արգելքներին և եթե աշխարհագրական բնական արգելքների վրա չհիմնվելով չիրականացնեք այդ սահմանագծումը, ապամ հետագայում այն հիմք է հանդիսանալու լարումների, հակառակորդի կողմից ագրեսիայի, այն դեպքում երբ դուք՝ ՔՊ-ական մեծամասնությունը, չեք նախապատրաստել մեր զինված ուժերը, սահմանապահներին՝ դիմագրավելու հակառակորդի ագրեսիային»,- ասաց Սեյրան Օհանյանը։
Անդրադառնալով նրան, որ սահմանազատումը Տավուշի հատվածում պետք է ավարտվի մայիսի 15-ին, նա ասաց. «Դա նշանակում է, որ Ադրբեջանի կողմից ժամկետ է նշվել եւ այդ ժամկետները Հայաստանը պետք է կատարի»:
Օհանյանը դիմելով իշխանություններին, ասաց. «Այո, այսօր էլ ուղիղ նշանառության տակ են գտնվում Տավուշի սահմանապահ այդ գյուղերը, բայց բավականաչափ հեռվիցմ, մինչեւ մեկ կմ: Իսկ այս նոր սահմաններով, որով դուք եք թույլ տալու, մի քանի մետր է լինելու, բնակիչների տները հայտնվելու են հակառակորդի տարածքներում»:
Նա հայտնեց, որ երկրի ղեկավարը չի կարող ասել, որ պետք է ծառ տնկեն, որ ադրբեջանցիներին չտեսնեն։