ՀԱՊԿ ընդլայնումը տեսանելի ապագայում հավանական է, աշխարհում ավելանալու է կազմակերպության խաղաղարար առաքելությունների պահանջը։ Այս մասին հայտնել է ՀԱՊԿ գլխավոր քարտուղար Իմանղալի Տասմագամբետովը «Ազգային պաշտպանություն» ամսագրի գլխավոր խմբագիր Իգոր Կորոտչենկոյի հարցազրույցում։
«Իհարկե, նման հնարավորությունը սկզբունքորեն բացառված չէ»,- ասել է նա՝ պատասխանելով համապատասխան հարցին։ Տասմագամբետովի խոսքով՝ հին աշխարհակարգի փլուզման պայմաններում, որն ուղեկցվում է հին հակամարտությունների վերսկսմամբ եւ նորերի ի հայտ գալով, ռազմաքաղաքական դաշնակցության պահանջը զգալիորեն ավելանում է։ «Չի բացառվում, որ կազմակերպության ընդլայնման ինքնատիպ դրայվեր լինի համագործակցության նոր ձեւաչափերի ի հայտ գալը կամ մեր խաղաղապահ գործունեությունը ՀԱՊԿ բազայի հիման վրա, որի պահանջարկը տեսանելի ապագայում, ցավոք, միայն ավելանալու է»,- նշել է գլխավոր քարտուղարը։
Տասմագամբետովի խոսքով՝ «ՀԱՊԿ-ն մասնակցության բավական շահավետ պայմաններ է առաջարկում»։ «Գլխավորներից մեկը կարելի է համարել կոշտ բլոկային կարգապահության բացակայությունը եւ որոշումների ընդունման դեմոկրատական բնույթը կազմակերպության շրջանակում»,- ընդգծել է նա եւ ավելացրել, որ կարեւոր նշանակություն ունի նաեւ այն, որ ՀԱՊԿ-ն առաջնահերթությունը տալիս է ճգնաժամային իրավիճակների լուծման քաղաքական-դիվանագիտական մեթոդներին։
