Մենք տեսնում ենք, որ պաշտպանական համակարգերը, որոնք մենք ունենք եւ որոնց վրա էր հույսը, որ պետք է պաշտպանենք այս տարածքի անձեռնմխելիությունը, չեն աշխատում: Այս մասին մարտի 23-ին, Գյումրիում ՔՊ նախաձեռնող նիստի ժամանակ ասել է ՀՀ վարչապետ Նիկոլ Փաշինյանը:
«Մենք հիմա պետք է գտնենք լուծումներ, թե ոնց ենք մեր երկրի անվտանգությունը ապահովում: Ընդ որում, անվտանգություն ասելով մենք հասկանում ենք բանակ, բայց բանակը պետք է վերջում ասենք, որովհետեւ եթե բանակը մտավ գործի մեջ, ուրեմն վերջ արդեն գործն ավարտվել է եւ հերթը բանակինն է: Մենք ասում ենք, որ մեր անվտանգությունը ապահովելու համար, մենք պետք է մեր լեգիտիմության գծերի վրա կանգնենք, իսկ մեր լեգիտիմության գիծը, մեր միջազգայնորեն ճանաչված սահմանն է, որպեսզի որեւէ մեկը մեր վրա հարձակումը արդարեցնելու միջոց չունենա: Հիմա նաեւ ինչ-որ առումով մի շրջան է, որ մեզնից նախորդ 30 տարիների համար փորձելու են վրեժ լուծել: Մեր նախորդ 30 տարիները նրա մասին էր, որ մենք էլ իրենց արած նախորդի հետ կապված համարել ենք, որ արդարավածություն ունենք դա անելու համար: Այս ալիքները մենք պետք է կանգնեցնենք, որպեսզի հաջորդ սերունդներին հնարավորություն տանք ապրել հանգիստ, խաղաղ, ապահով»,-ասել է նա:
Ընդհանրացնելով խոսքը՝ Փաշինյանն ասել է, որ խոսքը նրա մասին է, թե երեկվա պատմության վրա ավելի շատ կկենտրոնանք, թե վաղվա պատմության:
«Այն, ինչ երեկ եղել է, մենք չենք կարող փոխել, բայց այն սպառնալիքը, որ վաղը լինելու է, մենք կարող ենք փոխել: Մենք պետք է կառուցենք վաղվա պատմությունը եւ մենք այսր պետք է որոշենք, թե այդ պատմությունը ինչ գույնի է, մենք պետք է այնպես անենք, որ վաղվա պատմությունը սեւ գույնի չլինի, որովհետեւ էդ սեւ գույնից մենք բոլորս հոգնել ենք: Դա պետք է մեր գլխում տեղի ունենա, հետեւաբար շատ կարեւոր է այս խոսակցությունը, բայց նաեւ շատ վտանգավոր է, որ մենք ինքներս մեզ չժխտենք, նիհիլիզմի մեջ չընկնենք»,-ասել է նա: