Նոր Toyota Land Cruiser-ը շուտով վաճառքի կհանվի Մեծ Բրիտանիայում։ Վաճառքի սկզբում ամենագնացը հասանելի կլինի երկու՝ Invincible և First Edition լրակազմով: Invincible-ը վաճառվում է 74 հազար 995 ֆունտ, իսկ First Edition-ը՝ 79 հազար 995 ֆունտ:

Բրիտանական CarsUK-ը հայտնել է, որ երկու վարկածներն էլ մի ընդհանրություն ունեն. երկուսի ուժային ագրեգատը՝ 2,8 լիտրանոց դիզելային շարժիչն է՝ 201 ձիաուժ հզորությամբ։ Ըստ Autonews-ի՝ նախատեսվում է 2025 թվականին Բրիտանիայում հիբրիդային շարժիչ տեղադրել Toyota Land Cruiser-ին։ Նոր սերնդի Toyota Land Cruiser-ը շատ է փոխվել։ Պրոֆիլում թափքի դիզայնն արտացոլում է դասական Land Cruiser ուրվագիծը՝ հստակ հորիզոնական գծերով:

Ընդհանուր երկարությունը 4920 մմ է, լայնությունը՝ 1980 մմ, բարձրությունը՝ 1870 մմ, անիվային բազան՝ 2850 մմ։ Առաջին թողարկումը նման է 1960-ականների Land Cruiser 40-ին՝ կլոր լուսարձակներով, երկգույն գուներանգով և 18-դյույմանոց սև անիվներով:

2024 թվականի արտադրության Toyota Land Cruiser-ի ինտերիերը հագեցած է յոթ նստատեղով՝ սև կաշվե պաստառներով: Օդորակիչը կարելի է կառավարել առջևի և հետևի նստատեղերից: Նոր նմուշն ունի Toyota Smart Connect+ մուլտիմեդիա համակարգ՝ 12,3 դյույմանոց սենսորային էկրան, վարորդի թվային դիսփլեյ և համայնապատկերային տեսախցիկ: