Անգամ խաղաղության պայմանագրի ստորագրումը չի երաշխավորելու, որ ամեն ինչ լավ ա է լինելու։ Այս մասին այսօր՝ ապրիլի 30-ին, Ազգային ժողովում՝ լրագրողների հետ զրույցում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը:
«Անգամ խաղաղության պայմանագրից հետո չկա որևէ սուբյեկտ, որ կարող է դուրս գալ ու ասել՝ վերջ, 100 տոկոս ամեն ինչ շատ լավ է լինելու։ Մենք ասում ենք՝ ռիսկեր կան»,- ասաց նա:
Հովհաննիսյանի խոսքով՝ կան պրոցեսներ, որոնց միջով անցնում է Հայաստանը. «Հիմա սահմանազատված սահման ունենալն էականորեն նվազեցնում է էսկալացիայի ռիսկը։ Մենք գործ ունենք Ադրբեջանի հետ, մենք չգիտենք՝ իրենց մտքում որ պահին ինչ կարող է գալ եւ ինչ տրամաբանության կարող են անցնել»,- նշեց ՔՊ-ականը՝ հավելելով, թե իրենք փորձում են հնարավորինս նվազեցնել էսկալացիոն ռիսկերը։
