Դաշնակցությունը, կարծում եմ, երբեք դաշնակիցներ չի ունեցել, ունեցել է տերեր, հիմա էլ է այդ տրամաբանությունը: Այս մասին այսօր՝ ապրիլի 30-ին, ԱԺ-ոում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ դիմելով ընդդիմությանը:
«Հայաստանի և Ադրբեջանի միջև չափազանց կարևոր արձանագրություն է ստորագրվել և մենք ֆիքսել ենք սկզբունք՝ Արամթիի հռչակագիրը, որով պետք է սահմանազատում և սահմանագծում իրականացնենք: Սրան դեմ էր Ադրբեջանը, որն արդեն համաձայնվել է, բայց ընդդիմությունը դեռևս շարունակում է դեմ լինել՝ շարունակելով Ադրբեջանի նարատիվները»,- ասաց Հովհաննիսյանը:
Վերջինս նկատեց՝ շատ կարևոր է ադրբեջանական 4 գյուղերի մասին իմանալը, և ընդդիմությունն էլ շատ լավ գիտի, որ դրանք վերջին լեգիտիմ փաստարկներն են Ադրբեջանի համար՝ ՀՀ-ի վրա հարձակվելու համար. «Ընդդիմությունը սա գիտի, գիտի և ամեն ինչ անում է, որ այս պրոցեսը տեղի չունենա՝ Հայաստանին պատերազմի մեջ ներքաշելու համար, հետո հայտնի սցենարով փրկիչներին բերելու համար, Հայաստանում մի գավառապետ նշանակելու համար՝ իր գեղեցիկ միջանցքով, սա է ընդդիմության նպատակը»,-ասաց նա:
Հովհաննիսյանի խոսքով՝ ընդդիմությունը խոսում է պետականությունից, միջազգային իևրավունքից, սակայն նույն ընդդիմության ներկայացուցիչը, խոսում է, որ սահմանն ավարտվում կամ սկսվում է այնտեղ, որտեղ կանգնած է զինվորը, ինչն անգրագիտության ամենավերևի մակարդակն է:
«Լեռնային Ղարաբաղի ուրացումից եք էլի խոսում, ժողովրդի ինքնորոշումից եք խոսում. լո՞ւրջ եք ասում, գոնե դուք դրա մասին մի խոսեք: Ձեր պալատական հեղաշրջման արդյունքում Արցախում իշխանափոխություն արեցիք, հետո ԼՂ-ի հայ ժողովրդի իրավունքների պաշտպանության համար ԼՂ ներկայացուցիչներին Սոֆիայի փոխարեն Եվլախ ուղարկեցիք, դուք եք ԼՂ ներկայացուցիչներին Եվլախ ուղարկել»,- ասաց Հովհաննիսյանը և հավելեց. «Մենք ձեզ հարցնում ենք ՀՀ սուվերեն տարածքը քանի՞ քառակուսի կիլոմետր է, դուք դրա պատասխանը չգիտեք: Գիտեք խի՞, որովհետև աշխարհում ձեր նման հակապետական ընդդիմություն պարզապես գոյություն չունի»,- հայտարարեց ՔՊ խմբակցության քարտուղարը:
