Երևանի Կոնստանտին Ստանիսլավսկու անվան ռուսական պետական դրամատիկական թատրոնի տնօրեն Սուրեն Շահվերդյանը ապրիլի 12-ին դիմել է ՆԳՆ Ոստիկանության կենտրոնական բաժին և հայտնել, որ դերասան Վահագն Սիմոնյանն իր հասցեին անհիմն մեղադրանքներ ու սպառնալիքներ է հնչեցնում: Այս մասին NEWS.am-ի հետ զրույցում ասաց Սուրեն Շահվերդյանը:
Ապրիլի 6-ին Վահագն Սիմոնյանն իր ֆեյսբուքյան էջում տեսագրություն է հրապարակել, որտեղ Սուրեն Շահվերդյանին մեղադրում է իր երեխաներին ապօրինաբար երկրից դուրս տանելու մեջ, սպառնալիքներ է հնչեցնում նրա հասցեին, 24 ժամ ժամանակ տալիս երեխաներին իրեն վերադարձնելու համար:
Սուրեն Շահվերդյանը պարզաբանում է, որ Վահագն Սիմոնյանի նախկին կինը տարիներ առաջ ամուսնացել է իր ընկերոջ հետ և երեխաների հետ միասին մեկնել ԱՄՆ: Վահագն Սիմոնյանը պնդում է, որ Սուրենը մասնակցել է իր ընտանիքի տեղափոխումը կազմակերպելուն, եւ նա կարող է իր երեխաներին Հայաստան վերադարձնել:
Մեզ հետ զրույցում Սուրեն Շահվերդյանը պատմեց, որ սպառնալիքները միայն տեսագրությամբ չեն սահմանափակվում, նա ժամանակ առ ժամանակ զանգահարում է իր անձնական հեռախոսահամարին, սպառնում, հայհոյանքներ ու մեղադրանքներ հնչեցնում: