Ղրիմում ապրիլի լույս 17-ի գիշերը Ջանկոյում գտնվող ռազմական օդանավակայանի շրջանում պայթյուններ են տեղի ունեցել, և հրդեհ է բռնկվել։
Ըստ «Крымский ветер» տելեգրամյան ալիքի, ապրիլի լույս 17-ի գիշերը արբանյակը հրդեհի վեց օջախ է գրանցել Ջանկոյի ռազմական օդանավակայանում և դրա մոտակայքում։ Այս օդանավակայանում, նշում է ալիքը, տեղակայված էին հարվածային ուղղաթիռներ, նկատվել են նաև S-300/C-400 հակաօդային պաշտպանության հրթիռային կայաններ։
Ջանկոյ-Թեոդոսիա ավտոճանապարհի Ջանկոյին հարող հատվածը ժամանակավորապես փակ է երթևեկության համար, կազմակերպվել է շրջանցիկ ճանապարհ, հայտարարել է թերակղզու տրանսպորտի նախարարությունը՝ չնշելով դրա պատճառը։
Ղրիմի ղեկավար Սերգեյ Ակսենովը տեղեկության հրապարակման պահին չի մեկնաբանել Ջանկոյում տեղի ունեցածը։
Ուկրաինական լրատվամիջոցները և հետախուզության գլխավոր վարչության ներկայացուցիչները դեռ պաշտոնապես չեն հայտարարել օդանավակայանի վրա հարձակման մասին։
Baza-ն, չհստակեցնելով տեղեկատվության աղբյուրը, գրում է, որ Ջանկոյում գտնվող օդանավակայանը հավանաբար գրոհել են բալիստիկ հրթիռներով։ Ընդհանուր առմամբ, նախնական տվյալներով, օդանավակայանի ուղղությամբ արձակվել է յոթ կամ ութ հրթիռ, հայտնում է պարբերականը՝ հավելելով, որ օդանավակայանի տարածքում, ենթադրաբար, գործել է հակաօդային պաշտպանություն։