Գերմանիայի արտաքին գործերի նախարար Աննալենա Բերբոքը 2022թ. փետրվարին Ուկրաինա ռուսական ներխուժումից հետո յոթերորդ անգամ այցելել է Կիեւ, տեղեկացրել է n-tv-ն։

Նախարարը այցն սկսել է երեքշաբթի առավոտյան, որը, ինչպես սովորաբար, չի ազդարարվել՝ անվտանգության նկատառումներով։

Տեսանյութը X-ում տեղադրել է Spiegel-ի լրագրող Քրիստոֆ Շուլթը։

Բերբոքը Ուկրաինային հակաօդային պաշտպանության ոլորտում միջազգային աջակցության ուժեղացման կոչ է արել։

«Ուկրաինան պաշտպանելու համար ավելի շատ հակաօդային պաշտպանության միջոցներ են անհրաժեշտ»,- ասել է նա իր յոթերորդ այցի սկզբում։

«Մենք պետք է  այժմ միավորենք ջանքերը, որպեսզի Ուկրաինան կարողանա գոյատեւել (...) եւ որպեսզի Պուտինի զորքերը շուտով չհայտնվեն մեր սեփական սահմանների մոտ»,- դիմել է Բերբոքը միջազգային գործընկերներին։

Հակաօդային պաշտպանության ուժեղացման գլոբալ նախաձեռնությունը, որը նա ձեռնարկել է պաշտպանության նախարար Բորիս Պիստորիուսի հետ միասին, մոտ մեկ միլիարդ եվրո է հավաքել հակաօդային պաշտպանության ուկրաինական ուժերին լրացուցիչ աջակցություն ցուցաբերելու համար, նշել է նախարարը։

«Եվ մենք ինտենսիվորեն աշխատում ենք, որպեսզի այդ գումարը էլ ավելին լինի։ Մենք շրջում ենք յուրաքանչյուր քար մի քանի անգամ եւ առաջ ենք գնում Patriot լրացուցիչ համալիրով»,- ավելացրել է նա։