Թուրքիայի արտաքին գործերի նախարար Հաքան Ֆիդանը կիրակի օրը իր իրանցի պաշտոնակից Հոսեյն Ամիր Աբդոլլահիանին ասել է, որ Թուրքիան չի ցանկանում հետագա սրացում տարածաշրջանում Իսրայելի դեմ Թեհրանի պատասխան գործողություններից հետո, հայտնում է Anadolu-ն։
Դիվանագիտական աղբյուրներից ստացված տեղեկության համաձայն, իրանցի բարձրաստիճան դիվանագետը հեռախոսազրույցում ասել է, որ Իսրայելի դեմ պատասխան գործողությունն ավարտված է, և Իրանը նոր գործողություն չի ձեռնարկի, քանի դեռ իր վրա չեն հարձակվել։
Ամիր Աբդոլլահիանը նաև նշել է, որ եթե Իրանը կրկին հարձակման ենթարկվի, այս անգամ այն «ավելի ուժեղ պատասխան» կտա։
Ապրիլի 14-ի գիշերը Իրանը անօդաչուների և հրթիռների կիրառմամբ գրոհ է ձեռնարկել Իսրայելի վրա՝ ի պատասխան ապրիլի սկզբին Դամասկոսում Իրանի հյուպատոսության վրա իսրայելական ավիահարվածի, որի հետևանքով Իրանի Իսլամական հեղափոխության պահապանների կորպուսի 7 ռազմական խորհրդական էր զոհվել: