Չինաստանը միշտ կլինի ՄԱԿ-ի վստահելի գործընկերը, հայտարարել է ՉԺՀ նախագահ Սի Ծինփինը շաբաթ օրը՝ Տյանցզին նավահանգստային քաղաքում ՄԱԿ-ի գլխավոր քարտուղար Անտոնիու Գուտերեշի հետ հանդիպման ժամանակ, հաղորդում է «Սինհուա» գործակալությունը։
Սի Ծինփինը նշել է, որ Չինաստանը պատրաստ է խորացնել համագործակցությունը ՄԱԿ-ի հետ, աջակցել կազմակերպության կենտրոնական դերին միջազգային հարաբերություններում և համատեղ պատասխանատվություն կրել համաշխարհային խաղաղության պահպանման, զարգացման և բարգավաճման խթանման գործում։ Գուտերեշը Տյանցզին է ժամանել՝ մասնակցելու Շանհայի համագործակցության կազմակերպության 2025 թվականի գագաթնաժողովին։
Նախագահը հիշեցրել է, որ այս տարի նշվում է Հակաֆաշիստական համաշխարհային պատերազմի հաղթանակի և ՄԱԿ-ի հիմնադրման 80-ամյակը՝ ընդգծելով, որ պատմությունը ցույց է տվել, որ բազմակողմանիությունը, համերաշխությունն ու համագործակցությունը ճիշտ պատասխան են գլոբալ մարտահրավերներին։
Սի Ծինփինը կոչ է արել վերականգնել ՄԱԿ-ի հեղինակությունն ու կենսունակությունը նոր պայմաններում, որպեսզի կազմակերպությունը շարունակի ծառայել որպես հիմնական հարթակ՝ երկրների գործողությունների համակարգման և համատեղ խնդիրների լուծման համար։
Ըստ նրա, աշխարհը ապրում է վերջին հարյուր տարվա ընթացքում աննախադեպ փոփոխություններ, և Չինաստանը ապահովում է կայունություն ու կանխատեսելիություն՝ շարունակելով առաջարկել նոր հնարավորություններ իր զարգացման միջոցով։
Անտոնիու Գուտերեշը նշել է, որ ներկայումս բազմակողմանիությունը, միջազգային իրավունքը և ՄԱԿ-ի հեղինակությունը բախվում են լուրջ մարտահրավերների, և միջազգային կառավարման համակարգը խիստ կարիք ունի բարեփոխումների։ Նա ընդգծել է, որ այժմ ճիշտ ժամանակն է վերադառնալու ՄԱԿ-ի հիմնադրման սկզբնական ձգտումներին և արժեքներին։
Գուտերեշը Չինաստանն անվանել է բազմակողմանիության պաշտպանության հիմնասյուն և վստահեցրել է, որ ՄԱԿ-ը պատրաստ է ամրապնդել համագործակցությունը ՉԺՀ-ի հետ՝ նպաստելու աշխարհի բազմաբևեռությանը, զարգացող երկրների ներկայացվածության ընդլայնմանը և ՄԱԿ-ի դերի ուժեղացմանը միջազգային հարաբերություններում։
Հանդիպմանը մասնակցել են նաև բարձրաստիճան պաշտոնյաներ՝ այդ թվում՝Ցայ Ցին, Վան Ին և Չեն Մինյերը։
