Անապայի առողջարաններից մեկում հանգստացողներին խնդրել են բախիլներ հագնել՝ լողափ դուրս գալուց առաջ, որովհետև ափը տուժել է մազութի արտահոսքից, գրում է RusNews-ը։ «Հարգելի՛ հյուրեր։ Կերչի նեղուցի շրջանում նավթամթերքի արտահոսքի պատճառով, խնդրում ենք լողափ այցելելիս բախիլներ հագնել», — ասվում է վարչակազմի հայտարարության մեջ։ Ինչպես նշում է RusNews-ը, առողջարանը պատկանում է Ռուսաստանի Դաշնության դաշնային հարկային ծառայության առողջարանների համակարգին։
Այս տարվա դեկտեմբերի 15-ին Կերչի նեղուցում երկու տանկերի վթարից հետո Կրասնոդարի երկրամասի Սևծովյան ափի լողափերը աղտոտվել են մազութով։ Այդ ժամանակ Սև ծով է թափվել առնվազն 4000 տոննա մազութ՝ նավերի վրա գտնվող ավելի քան 9000 տոննայից։ Դա հանգեցրել է թռչունների և ծովային կյանքի զանգվածային մահվան, իսկ արտահոսքը հասել է Ղրիմի, Օդեսայի և Աբխազիայի ափեր։ Ավելի շատ տուժել է Անապայի ափագիծը, որտեղ իշխանություններն արգելել են լողալը։ Արտահոսքի հետևանքները վերացնելու աշխատանքները շարունակվում են ութերորդ ամիսը։ Օգոստոսի 12-ին Ջեմետեի ջրասուզակները հավաքել և ափ են հանել 253 պարկ աղտոտված հող։ Միաժամանակ, Ռոսպրիրոդնադզորի ներկայացուցիչը ավելի վաղ հայտարարել է, որ Սև ծով թափված ողջ մազութը հնարավոր չէ հավաքել։ Գերատեսչությունից նաև նշել են, որ վառելիքը շարունակում է ջուր թափվել խորտակված «Վոլգոնեֆտ-212» տանկերից։
Չնայած էկոլոգիական աղետին և լողափնյա սեզոնի բացման արգելքին՝ ռուսները մեկնել են հանգստանալու Անապա։ Հուլիսի վերջի դրությամբ հանգստավայրի հյուրանոցների միջին լցվածությունը հասել է գրեթե 30%-ի, իսկ հանգստացողների ընդհանուր թիվը կազմել է մոտ 24 հազար մարդ, հայտնել է Կրասնոդարի երկրամասի ղեկավար Վենիամին Կոնդրատևը։ Նրա խոսքով՝ այս տարի Անապայում գործում է գրեթե 1,6 հազար հյուրանոցներից 950-ը։ Կոնդրատևը «լուրջ խնդիր» է անվանել զբոսաշրջային հոսքի կտրուկ անկումը և խոստացել է լրացուցիչ օգնություն ցուցաբերել բիզնեսին։ Միաժամանակ, տեղացի ձեռնարկատերերը մինչ այդ հայտարարել են մեծ վնասների մասին՝ զբոսաշրջիկների բավարար քանակի բացակայության պատճառով։ «Մենք մնացել ենք պարտքերով, առանց եկամուտների։ Ոմանք 4-6 միլիոն ռուբլու, կամ նույնիսկ 25 միլիոն ռուբլու վարկեր են վերցրել, որպեսզի զարգացնեն իրենց բիզնեսը։ Իսկ հիմա նրանք պարզապես չգիտեն՝ ինչպես ապրեն»,- նշել է Անապայի հյուրատներից մեկի սեփականատերը։
