Վերջին տվյալներով՝ Պակիստանում հունիսի վերջից սկսված մուսսոնային անձրևների և դրանց հետևանքով առաջացած ջրհեղեղների պատճառով զոհվել է առնվազն 660 մարդ, ևս 929-ը տուժել են։ Այս մասին հայտնել է երկրի Արտակարգ իրավիճակների ազգային վարչությունը։

Տուժել է մոտ 2,5 հազար շենք, գրեթե 30 հազար մարդ տարհանվել և տեղավորվել է ժամանակավոր ապաստարաններում։ Զգալի վնաս է հասցվել անասնապահությանն ու գյուղատնտեսությանը։

Ըստ զեկույցի՝ ամենամեծ զոհերը հյուսիսարևմտյան Խայբեր-Պախտունխվա նահանգում են՝ 392 զոհ և 245 տուժած։ Հյուսիսարևելյան Փենջաբ նահանգում գրանցվել է 164 զոհ և 582 վիրավոր։ Զոհերի մասին հաղորդագրություններ են ստացվել նաև Սինդ, Բելուջիստան, Գիլգիտ-Բալտիստան նահանգներից և մի շարք այլ վայրերից։

Երկրի իշխանությունները ջանքեր են գործադրում՝ ուղղված մարդկանց կյանքը փրկելուն և տարերային աղետից հասցված վնասը նվազագույնի հասցնելուն։

Սեզոնային մուսսոնային անձրևները Պակիստանում սովորաբար տևում են հունիսից մինչև սեպտեմբեր՝ բերելով առատ տեղումներ, որոնք կենսական նշանակություն ունեն գյուղատնտեսության համար, սակայն հաճախ հանգեցնում են ջրհեղեղների և բնական այլ աղետների։