Իրանի և Ատոմային էներգիայի միջազգային գործակալության (ԱԷՄԳ) ներկայացուցիչների բանակցությունները կարող են տեղի ունենալ առաջիկա օրերին։ Այդ մասին հայտարարել է Իրանի արտգործնախարարության պաշտոնական ներկայացուցիչ Իսմայիլ Բաղային։
«Առաջիկա օրերին գործակալության հետ կարող է լինել բանակցությունների ևս մեկ փուլ», - ասել է նա ամենշաբաթյա մամուլի ասուլիսում։
Իրանի պաշտոնյաների և ԱԷՄԳ-ի ներկայացուցչի միջև օգոստոսի 11-ին Թեհրանում կայացած բանակցություններից հետո Իսլամական Հանրապետության փոխարտգործնախարար Քազեմ Ղարիբաբադին հայտնել է, որ կողմերը համաձայնության են եկել Իրանի միջուկային ծրագրի շուրջ խորհրդակցությունները շարունակելու վերաբերյալ: Դիվանագետը մանրամասնել է, որ ԱԷՄԳ-ի գլխավոր տնօրենի տեղակալ Մասիմո Ապարոյի հետ հանդիպման ժամանակ քննարկվել է Թեհրանի և գործակալության միջև ներկայիս պայմաններում փոխգործակցության ձևաչափը: Ղարիբաբադին նշել է, որ իրանական կողմը բողոք է հայտնել ԱԷՄԳ-ի կողմից Իրանի վրա Իսրայելի և ԱՄՆ-ի հարձակման ժամանակ իր պարտավորությունները չկատարելու կապակցությամբ:
ԱԷՄԳ-ի կողմից Իրանի միջուկային օբյեկտների վրա Իսրայելի և ԱՄՆ-ի հարվածները չդատապարտելը քննադատության տեղատարափ է առաջացրել Իսլամական Հանրապետությունում և մեղադրանքներ է առաջացրել գործակալության ղեկավարության հասցեին՝ իր գործունեությունը քաղաքականացնելու համար: Հուլիսի 2-ին Իրանի նախագահ Մասուդ Փեզեշքիանը ստորագրել է օրենք, որը դադարեցնում է ԱԷՄԳ-ի հետ համագործակցությունը: Հուլիսի 22-ին Իրանի արտաքին գործերի նախարար Աբբաս Արաղչին հայտարարել է, որ Իրանը չի բացառում ապագայում գործակալության տեսուչների իր տարածք վերադառնալու հնարավորությունը:
