«Ինչ-որ մի փուլի եկել հանգել ենք, որ պետք է իրականացնենք նոր վերամշակման գործարանի երկփուլ մրցույթ, և անկեղծ ասած՝ ես շատ մտահոգված եմ, որ որոշակի պարբերականությամբ այս միջավայրում չեմ լսում, թե ինչ է տեղի ունենում մրցույթի հետ կապված»: Այս մասին այսօր՝ օգոստոսի 18-ին, Երևանի քաղաքապետարանի գործակարգավարական նիստում ասաց Տիգրան Ավինյանը՝ անդրադառնալով Նուբարաշենի աղբավայրում վերջերս տեղի ունեցած խոշոր հրդեհին։

«Կամ մինչև տարեվերջ մրցույթը կկայանա, կամ ես արդեն համապատասխան կադրային որոշումներ կկայացնեմ, որովհետև սա Երևան քաղաքի ամենակարևոր, ամենադժվարին հացերից մեկն է, և այստեղ այլևս հապաղել մենք չենք կարող»–նշեց Ավինյանը:

Քաղաքապետի խորհրդական Կամո Արեյանը նիստի ընթացքում ներկայացրեց, որ Նուբարաշենի աղբավայրում բռնկված հրդեհը օգոստոսի 9-ի առավոտյան արդեն մարված է եղել, բայց աղբավայրը շարունակել է ծխալ։

«Օրական աշխատել է 20-22 միավոր տեխնիկա, հողի ծածկույթով տարածքը լցնելու համար պահանջվեց 9 օր, երեկ՝ կիրակի օրվա դրությամբ տարածքն ամբողջությամբ ծածկվել է հողով, 9 օրում աղբավայր է տեղափոխվել 2450 մեքենա հող։ Փոքր բաներ են մնացել, որ հիմա շարունակում են աշխատանքները»,-հավելեց Արեյանը։