Օգոստոսի 10-ին Սյունիքի մարզի Սիսիան քաղաքում տեղի ունեցավ արդեն ավանդական դարձած «Նավասարդ» հայ–իրանական մշակութային–խոհանոցային փառատոնը։ Այն անցկացվում է արդեն չորրորդ տարին՝ Տուրիզմի հայկական ֆեդերացիայի և «Հայ խոհարարական ավանդույթների զարգացման և պահպանման» հասարակական կազմակերպության համատեղ նախաձեռնությամբ։ Փառատոնը իրականացվում է ՀՀ էկոնոմիկայի նախարարության զբոսաշրջության կոմիտեի աջակցությամբ, ՀՀ Սյունիքի մարզպետարանի, Սիսիանի համայնքապետարանի, ՀՀ-ում ԻԻՀ դեսպանության մշակութային կենտրոնի և Կապանում Իրանի գլխավոր հյուպատոսության հետ համագործակցությամբ։

Այս տարվա միջոցառումն ընդգրկում էր մշակութային, գեղարվեստական և խոհարարական տարրերի լայն ծրագիր։ Իրանական կողմը ներկայացել էր 32 տաղավարով, որտեղ ցուցադրված էին ինչպես ավանդական ուտեստներ, այնպես էլ հյուսիսային և հարավային Իրանի մշակութային ձեռագործ աշխատանքներ, խմիչքներ և այլ արտադրանք։

Սիսիանի համայնքի ղեկավար Հովսեփ Առաքելյանը իր բացման խոսքում շեշտել է, որ փառատոնի մասնակիցների աճը վկայում է հետաքրքրության մեծացման մասին․

«Մասնակիցների տարեցտարի աճող թիվը լավագույն փաստն է, որ փառատոնի նկատմամբ հետաքրքրությունը մեծանում է, ինչը խթան կհանդիսանա երկու բարեկամ ժողովուրդների ամուր մերձեցմանը»։

Հայաստանում Իրանի դեսպանության մշակույթի կենտրոնի ղեկավար Մոհամմադ Ասադին ընդգծել է նման միջոցառումների կարևորությունը ոչ միայն մշակութային, այլև քաղաքական ու տնտեսական հարաբերությունների խորացման գործում․

«Նման փառատոների անցկացումը կարող է նպաստել մշակութային հարաբերությունների ամրապնդմանը և Իրանի և Հայաստանի երկու բարի ազգերի միջև ավելի շատ բարեկամության ստեղծմանը։ Մշակույթն ու քաղաքակրթությունը նպաստում և նախապատրաստում են երկու ազգերին, ինչը նպաստում է քաղաքական հարաբերությունների աճին, ինչպես նաև տնտեսական հարաբերություններին։ Յուրաքանչյուր երկիր, որտեղ զարգանում են մշակութային և գեղարվեստական հարաբերությունները երկու երկրների միջև, բնականաբար, կզարգացնի նաև իր տնտեսական և քաղաքական հարաբերությունները»։

Կապանում Իրանի գլխավոր հյուպատոս Մորթեզա Աբեդին Վարամինը համոզված է, որ փառատոնն արդեն դարձել է երկկողմ ջերմ հարաբերությունների խորհրդանիշ․

«Այս փառատոնի՝ արդեն չորս տարի անցկացումը ցույց է տալիս մեր երկու երկրների ջերմ ու խաղաղ հարաբերությունները։ Ամեն տարի էլ ավելի ճոխ ու մարդաշատ է անցնում միջոցառումը, և դա պատահական չէ, այլ գալիս է մեր հազարամյակների պատմությունից։ Այն ժամանակ ո’չ Արմուտքը գոյություն ուներ, ո’չ Արևմտյան երկրները»։

Փառատոնի առանցքային միջոցառումներից է խոհարարական մրցույթը, որը ներառում է երեք անվանակարգ՝ «Լավագույն համ», «Լավագույն ուտեստ» և «Լավագույն մտահղացում»։ Մրցույթին մասնակցում են տաղավարների ներկայացուցիչները, որոնք ազատ են պատրաստել ինչպես ազգային, այնպես էլ հեղինակային ուտեստներ։

«Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը մասնավորապես ընդգծել է խոհարարների միջև փորձի փոխանակման նշանակությունը․

«Սա ևս մեկ անգամ հնարավորություն է տալիս մեր և իրանցի խոհարարներին շփվելու, փոխանակվելու մտքերով, նաև ինչ-որ մի կերպ հարաբերվելու համար, որովհետև դա շատ կարևոր է․ խոհարարական աշխարհում շփումները մեծ դեր ունեն։ Եվ մեր հիմնական նպատակներից է նաև խոհարարության զարգացումը այս միջոցառման միջոցով»։

Կազմակերպիչների խոսքով, առաջիկայում նախատեսվում է «Նավասարդ» փառատոնը դարձնել երկօրյա, ինչը հնարավորություն կտա հարստացնել միջոցառման ծրագիրը և ապահովել ավելի լայն մասնակիցների ու այցելուների ներգրավվածություն։