ԱՄՆ նախագահի հատուկ ներկայացուցիչ Սթիվեն Վիտկոֆը, որը օգոստոսի 6-ին Մոսկվա էր ժամանել Վլադիմիր Պուտինի հետ բանակցությունների, հնարավոր է՝ սխալ է հասկացել Ռուսաստանի նախագահին, պնդում է Bild-ը՝ հղում անելով գերմանացի և ուկրաինացի պաշտոնյաներին։
Հրատարակության աղբյուրները նշում են, որ այն տեղեկությունները, որ Պուտինը պատրաստ է հրաժարվել Զապորոժիեի և Խերսոնի մարզերի նկատմամբ իր պահանջներից և պահանջում է միայն ուկրաինական զորքերի դուրսբերում Դոնբասից, կարող են սխալ լինել։
Նրանց խոսքով՝ Ռուսաստանը պահանջում է ուկրաինացիների «խաղաղ դուրսբերում» Խերսոնից և Զապորոժիեից։ Սակայն Ուիտկոֆը սա հասկացել է որպես ռուսների «խաղաղ դուրսբերում» այդ շրջաններից։ Իրականում, Պուտինը դեռևս ցանկանում է լիովին վերահսկել Ուկրաինայի բոլոր չորս շրջանները՝ Դոնեցկը, Լուգանսկը, Զապորոժիեն և Խերսոնը, պնդում են Bild-ի աղբյուրները։
«Ուիտկոֆը չգիտի, թե ինչի մասին է խոսում», - հրատարակությանը ասել է Ուկրաինայի կառավարության մի պաշտոնյա։ Bild-ի փոխանցմամբ՝ այս գնահատականը կիսում են նաև Գերմանիայի կառավարության ներկայացուցիչները։
Նրանց տեղեկությունների համաձայն՝ Պուտինը առաջարկել է միայն մասնակի հրադադար՝ հրաժարվելով էներգետիկ օբյեկտներին և թիկունքում գտնվող խոշոր քաղաքներին հարձակվելուց, բայց ոչ համապարփակ հրադադար։ ԱՄՆ-ն, ընդհակառակը, առաջարկել է սառեցնել հակամարտությունը ներկայիս առաջնագծի երկայնքով՝ պատժամիջոցների լայնածավալ վերացման և Ռուսաստանի հետ նոր տնտեսական համաձայնագրերի դիմաց։ Bild-ի փոխանցմամբ՝ Կրեմլը չի ցանկացել ընդունել այս առաջարկը։
Ուիտկոֆի հետ Պուտինի բանակցություններից կարճ ժամանակ անց ամերիկացի պաշտոնյաները հեռախոսազրույց են ունեցել եվրոպացիների հետ։ Եվ նրանք տպավորություն են ստացել, որ ամերիկացիներն իրենք լիովին չեն հասկանում, թե ինչ է կատարվում, գրում է Bild-ը։
Եվրոպացիների համար ճեպազրույցին մասնակցած Ուիտկոֆի հայտարարությունները ընկալվել են որպես շփոթեցնող։ Նա թվում էր անգործունակ տարածքային հարցերի մասին խոսելիս, նշում է Bild-ը։
Bloomberg-ը և The Wall Street Journal-ը նախորդ օրը հայտնել են, որ Պուտինը պատրաստ է մասամբ հրաժարվել Ուկրաինայի նկատմամբ իր մաքսիմալիստական տարածքային պահանջներից։ Նրանց խոսքով՝ Կրեմլը պատրաստ է սառեցնել ճակատը և դադարեցնել հարձակումը Խերսոնի և Զապորոժիեի մարզերում՝ Դոնբասից ուկրաինական զորքերի դուրսբերման, ինչպես նաև Ղրիմի նկատմամբ Ռուսաստանի վերահսկողության ճանաչման դիմաց։
Bloomberg-ի աղբյուրները հայտնել են, որ նման «տարածքային փոխանակումը» պետք է դառնա հրադադարի, ապա վերջնական խաղաղության համաձայնագրի վերաբերյալ տեխնիկական բանակցությունների սկիզբ։
