Հայաստանի Կենտրոնական բանկը և Շվեյցարական զարգացման կազմակերպությունը՝ Helvetas-ը, միացել են Power Consulting Days (PCD) ծրագրին, որը ներդրումների վերաբերյալ սեմինարների, գործնական մասնագիտական երեք միջացառումների շարք է և կմեկնարկի այս տարվա սեպտեմբերին: Ծրագիրն իրականացնում են BDO Armenia-ն և Orion Worldwide Innovations-ը՝ բիզնեսներին կապիտալի շուկայի, մասնավոր բաժնեմասնակցության ոլորտի և նորարարությունների վերաբերյալ կարևոր գիտելիքներ և պրակտիկ հմտություններ տրամադրելու նպատակով:
PCD-ն ընկերությունների և անհատների համար է, որին կարող են մասնակցել գլխավոր տնօրեններ, ֆինանսական տնօրեններ, ստարտափների հիմնադիրներ, կառավարության ներկայացուցիչներ, ֆոնդերի կառավարիչներ, ընտանեկան գրասենյակների խորհրդատուներ, ներդրումների կառավարիչներ, մասնավոր ներդրողներ, հրեշտակ ներդրողներ և այլն:
PCD խորհրդատվական օրերի ընթացքում մասնակիցները կստանան ներդրումների և այլ ուղղություններով անհրաժեշտ գիտելիք հայաստանյան և համաշխարհային առաջատար մասնագետներից, կլսեն հաջողության պատմություններ։ 3 մոդուլների ընթացքում նրանք կծանոթանան նաև տնտեսության ընթացիկ վիճակի ցուցանիշներին, ներդրումների հետ առնչվող Հայաստանի օրենսդրական դաշտին և վերջին փոփոխություններին։
Հայաստանի Կենտրոնական բանկը ծրագրին միացել է որպես Կազմակերպչական գործընկեր. որպես Հայաստանում գների և ֆինանսական կայունության երաշխավոր, Հայաստանի Հանրապետության Կենտրոնական բանկն իր առջև դրված նպատակներն ու առաքելությունն իրականացնելու գործում կարևորում է կապիտալի շուկայի զարգացումը և ավանդական գործիքներին զուգահեռ, այլընտրանքային ներդրումային գործիքների խթանումը:
Helvetas-ը Power Consulting Days ծրագրին միացել է որպես Գլխավոր գործընկեր: Helvetas-ը Շվեյցարիայում հիմնված անկախ զարգացման կազմակերպություն է՝ գործընկեր կազմակերպություններով Գերմանիայում և Միացյալ Նահանգներում:
Power Consulting Days-ի հետ համագործակցությունն իրականացվում է Շվեդիայի կառավարության կողմից ֆինանսավորվող RECONOMY ծրագրի շրջանակում: RECONOMY-ն ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ Արևելյան գործընկերության և Արևմտյան Բալկանների երկրներում։
Ծրագրին մասնակցելու համար անհրաժեշտ է PCD ծրագրի պաշտոնական կայքում լրացնել հայտը և գրանցվել:
BDO Armenia-ն և Orion Worldwide Innovations-ն այս ռազմավարական խորհրդատվական և կրթական ծրագիրն իրականացնում են՝ Հայաստանի տնտեսության աճը խթանելու համար: Մասնակիցները կունենան նաև փորձագետների հետ կապեր հաստատելու և խորհրդակցելու գործնական հնարավորություններ:
Բի-Դի-Օ Արմենիա-ն, Բի-Դի-Օ Ըքքաունթինգը, Թաքս ընդ Լիգըլը և Բի-Դի-Օ Ըդվայզորին հանդիսանում են աշխարհում խոշորագույն աուդիտորական, հարկային և խորհրդատվական միջազգային ցանցերից մեկի՝ ԲիԴիՕ-ի անդամ։ Հիմնադրված լինելով 1963 թվականին՝ ԲիԴիՕ-ն Հայաստան մուտք է գործել 2010թ. և կարճ ժամանակում, իր շուրջը համախմբելով պրոֆեսիոնալ մասնագիտական թիմ, հաջողությամբ ընդլայնել է տրամադրվող ծառայությունների ցանկն՝ ապահովելով առաջատար դիրքերից մեկը հայաստանյան շուկայում:
Orion Worldwide Innovations-ը ստարտափների աճի և փոխկապակցված էկոհամակարգի զարգացման հանգույց է, որն առաջարկում է ծառայությունների ամբողջական փաթեթ: «Օրիոնը» ներդրումների ենթակա ընկերությունների համար ստեղծում է ԱՄՆ մուտք գործելու հնարավորություններ, բարելավում այդ ընկերությունների՝ հաճախորդներ ձեռք բերելու ռազմավարությունները, օգնում մնալ մրցունակ և պաշտպանում իրենց նորարարությունները։ «Օրիոնը» հիմնադրվել է 2017 թ., ԱՄՆ-ում։ Ընկերությունը գրասենյակներ ունի Նյու Յորքում և Երևանում, համագործակցում է աշխարհի տարբեր երկրներում գործող ընկերությունների և ներդրողների ցանցերի հետ։
