Իրանի նախագահ Էբրահիմ Ռաիսիի եւ նրա զինակիցների, որոնք զոհվել են ուղղաթիռի կործանման հետեւանքով, հրաժեշտի պաշտոնական արարողությունը սկսվել է Թեհրանում, այն գլխավորել է Իրանի ղեկավար եւ հոգեւոր առաջնորդ այաթոլա Ալի Խամենեին։ Իրանի մայրաքաղաքից ուղիղ հեռարձակումն իրականացնում է IRIB հեռուստաալիքը։
Արարողությանը, Իրանի հոգեւոր առաջնորդից բացի, ներկա են նախագահի պաշտոնակատար Մոհամադ Մոխբերը, խորհրդարանի խոսնակ Մոհամադ Բաղեր Գալիբաֆը, ԶՈւ Գլխավոր շտաբի պետ Մոհամադ Բաղերին։ Ռաիսիին հրաժեշտ տալու է եկել նաեւ պաղեստինյան արմատական ՀԱՄԱՍ շարժման քաղբյուրոյի ղեկավար Իսմայիլ Հանիան։ Խամենեիի աղոթքից հետո սգո թափորը շարժվում է Թեհրանի փողոցներով դեպի Հեղափոխության հրապարակ, ցանկացողներին հնարավորություն կընձեռվի անձամբ հրաժեշտ տալ նախագահին եւ նրա զինակիցներին։ Կադրերում երեւում է, որ Իրանի մայրաքաղաքի փողոցները լիքն են հազարավոր մարդկանցով, որոնք եկել են հրաժեշտ տալու ավիավթարի զոհերին։
Սպասվում է, որ արարողությանը մասնակցելու համար մայիսի 22-ին Թեհրան կգան Պետդումայի նախագահ Վյաչեսլավ Վոլոդինը, Հայաստանի վարչապետ Նիկոլ Փաշինյանը, Պակիստանի վարչապետ Շահբազ Շարիֆը եւ այլ բարձրաստիճան անձինք տարբեր երկրներից։
Մայիսի 20-ին Արեւելյան Ադրբեջան նահանգի իսլամական քարոզչության վարչության ղեկավար Սեյեդ Մահմուդ Հոսեյնին Mehr գործակալության հարցազրույցում հայտնել էր, որ Ռաիսին կթաղվի իր հայրենի Մեհշեդ քաղաքում, իմամ Մոհամադ Ալի Ալե Հաշեմը՝ Թավրիզում, իսկ Արեւելյան Ադրբեջանի նահանգապետ Մալեք Ռահմաթին՝ Մարաղա քաղաքում։ Թաղումները կկայանան մայիսի 23-ին։