«Հայաստան» խմբակցության պատգամավոր Գառնիկ Դանիելյանը Կիրանցից հասել է ԱԺ։ Ասաց, որ մտադիր չի եղել մասնակցել այսօրվա նիստին, սակայն կիրանցեցիներն են նրան խնդրել գնալ ու խոսել իրենց անունից։
«Գյուղում երեք սյուն են տեղադրել, գյուղը բաժանվել է երկու մասի: Գյուղում ստեղծվել է մի իրավիճակ, որն, իմ խորին համոզմամբ, այլեւս այնտեղ ապրել անհնարին է լինելու, եթե ադրբեջանցիները հան այդտեղ տեղակայվեն: Ողբերգական օրեր ենք ապրում: 50-ից ավելի վկայական միայն ինձ մոտ կա: Ես դա ցույ տվեցի ԱԺ ամբիոնից եւ ասացի, թե ինչ քաղաքականություն է վարում գործող իշխանությունը, եւ փաստացի հայկական Կիրանց գյուղը նվիրաբերվում է Ադրբեջանին առանց որեւէ ապրումակցման տարրերի, առանց որեւէ խղճի խայթի: Սա ներկայացվում է հաջողություն»,-ասաց նա:
Ընդդիմադիր պատգամավորի խոսքով, տեղի ունեցողը ոչ մի աղերս չունի սահմանազատման հետ, պարզապես Ադրբեջանը պահանջել է եւ հայկական գյուղը հանձնվում է. «Վրաստանի հետ սահմանազատումը գնում է արդեն 30 տարի եւ անգամ մի փոքր բլրի համար, մի քանի մետրի համար ճշգրտումներ են իրականացվում: Սահմանազատումն այդպես է արվում: Իսկ այս դեպքում Ադրբեջանը պահանջել է, հայկական կողմն էլ լիուլի բավարարում է այդ պահանջները, որ հանկարծ Ադրբեջանը չնյարդայնանա: Կիրանցը կիսվում է, դա ոչ մի կապ չունի սահմանազատման հետ:
Իրենց տունը կորցրած մարդկանց ասում են՝ եթե հիմա այս փոխհատուցումը չվերցնեք, վաղը դա էլ կարող է չլինել: Այսինքն շանտաժի են ենթարկում: Այսինքն ասում են՝ եթե քո տնից դուրս չգաս, կարմիրբերետավորներին կմտցնենք եւ ձեզ տնից կհանենք ծեծուջարդի միջոցով»,- հայտարարեց նա: