Բելգորոդում ավարտվել են որոնողափրկարարական եւ փլատակների մաքրման աշխատանքները բազմաբնակարան տան մուտքում, տեղեկացրել է ԱԻՆ-ը։
«Մասնագետներին հաջողվել է փրկել 17 մարդու։ Ցավոք, 15 հոգի մահացել է, նրանց դուրս են բերել փլատակների տակից»,- նշել են արտակարգ ծառայության աշխատակիցները։
Բացի այդ, երեք խաղաղ բնակիչ զոհվել է Բելգորոդում մայիսի 12-ի գիշերային գնդակոծության ժամանակ, տեղեկացրել է Բելգորոդի նահանգապետ Վյաչեսլավ Գլադկովը։ Մի կին, որը նախօրեին վիրավորվել էր, մահացել է հիվանդանոցում։
Մուտքի փլուզումը Շչորսի փողոցի տասը հարկանի շենքում տեղի է ունեցել մայիսի 12-ի առավոտյան։ ՌԴ ՊՆ տարբերակով՝ տան վրա է ընկել ուկրաինական խփված «Точка-У» հրթիռի բեկորը։ Ուկրաինան Բելգորոդի մարզի դեմ ուղղել է ընդհանուր առմամբ վեց «Точка-У», Vampire-ի չորս արկ եւ «Օլխա»-ի երկու ռեակտիվ արկ։
Ուկրաինայի ԶՈւ թիրախ կարող էր հանդիսանալ «Լուչ» ՋԷԿ-ը, որը գտնվում է փլուզված տան մոտ, գրել է Shot թելեգրամ-ալիքը։ Պայթյունը շենքում տեղի է ունեցել ստորին մասում, նշել է ՏԱՍՍ-ը։
Փլուզվել են բոլոր 10 հարկերը մուտքերից մեկում, որտեղ 40 բնակարան կար։ Փլուզվել է տանիքը փլատակները մաքրելու ժամանակ, ինչի հետեւանքով երեք փրկարար նույնպես հայտնվել է փլատակների տակ եւ վնասվել։ Բնակիչներին տարհանել են։ Տուժել է 20 մարդ, տեղեկացրել են Բելգորոդի մարզի իշխանությունները։
Քննչական կոմիտեն հարուցել է քրեական գործ ահաբեկչության մասին (ՔՕ 205 հոդված)։ «Ուկրաինայի զինված կազմավորումների գրոհի հետեւանքով արկը ընկել է բնակելի տան վրա։ Տեղի ունեցածի հետեւանքով կան զոհեր եւ տուժածներ»,- նշվել է գերատեսչության հայտարարությունում։
