ԱԷՄԳ-ի գլխավոր տնօրեն Ռաֆայել Գրոսսին միջուկային ծրագրի շուրջ Իրանի համագործակցության մակարդակը «բացարձակ անբավարար» է անվանել։
Գրոսին այս հայտարարությունն արել է Իրանում միջուկային համաժողովին մասնակցելուց հետո։
Գրոսսին Թեհրանին կոչ է արել կոնկրետ միջոցներ ձեռնարկել Իսլամական Հանրապետության միջուկային ծրագրի արագ զարգացման հետ կապված մտահոգությունները վերացնելու համար:
Իրանն ու ԱԷՄԳ-ն շարունակում են բանակցությունները երկրի միջուկային ծրագրի տեսչական ստուգումների ընդլայնման համաձայնագրի շուրջ։
«Մենք պետք է առաջ շարժվենք», - երեքշաբթի օրը Վիեննայում լրագրողներին ասել է Գրոսսին եւ հավելել. «Գործերի ներկա վիճակը ինձ լիովին անբավարար է թվում։ Մենք գրեթե փակուղում ենք, և դա պետք է փոխվի»:
Հունվարին Գրոսսին զգուշացրել էր, որ Իրանը բավականաչափ բարձր հարստացված ուրան է կուտակել մի քանի ատոմային ռումբ ստեղծելու համար, եթե որոշի դա անել: Գրոսսիի խոսքով՝ ԱԷՄԳ-ն չի կարող երաշխավորել, որ իրանական ցենտրիֆուգները չեն օգտագործվում գաղտնի ուրանի հարստացման համար։
«Ստուգումների մակարդակը [Իրանում] այնտեղ չէ, որտեղ պետք է լինի», - ապրիլին Sky News-ին ասել է Գրոսին: