Այս գազային հռետորաբանությունը կամ «գազային սիրավեպը» մեծ հաշվով ուղղված է ռուսական գործոնի դեմ: Այս մասին NEWS.am-ի հետ զրույցում նշեց էներգետիկ անվտանգության փորձագետ Վահե Դավթյանը՝ անդրադառնալով Ադրբեջանից գազ գնելու հեռանկարի մասին:
«Դրանով փորձ է արվելու ռուսական գազը դուրս մղել Հայաստանի շուկայից: Մենք պետք է հասկանանք, որ մեթանի մոլեկուլները կամ գազն ազգություն չունի, գլխավորն այն է, թե որ ենթակառուցվածքներով է այն գալիս եւ ում ես դու դրա համար վճարում: Եթե խոսքը Հայաստանի գազատրանսպորտային համակարգի մասին է, ապա հայտնի է, որ այն ամբողջությամբ պատկանում է ռուսական «Գազպրոմին»: Ուստի եթե նպատակ է դրվել խորապես դիվերսիֆիկացնելու կամ ապառուսիֆիկացնելու Հայաստանի գազատրանսպորտային համակարգը, ապա նախեւառաջ, պետք է դրվի երկու խնդիր. Ռաջինը, 2013 թվականի հայտնի գազային համաձայնագրերի վերանայում, երկրորդը, ամբողջ գազատրանսպորտային համակարգի ձեռքբերման հարցը պետք է քննարկվի:
Ոչ առաջինի, ոչ երկրորդի համար այսօրվա Երեւանը ռեսուրս եւ քաղաքական կամք չունի: Հետեւաբար, սա մերկապարանոց, պրոպագանդիստական հնարք է: Ես սրա հավանականությունը շատ ցածր եմ գնահատում»,-ասաց նա:
