Առնվազն երկու մարդ, այդ թվում՝ մեկ երեխա, է զոհվել, ևս չորսը վիրավորվել են ԱՄՆ Օկլահոմա նահանգով անցած տորնադոյի հետևանքով, հայտնում է AP-ն՝ վկայակոչելով տեղի իշխանություններին։

Ուրբաթ օրվանից հաղորդումներ են եղել տասնյակ տորնադոների մասին, որոնք ավերածություններ են գործել ԱՄՆ-ի կենտրոնական մասում, իսկ կիրակի օրվանից Օկլահոմայում և այլ նահանգներում, այդ թվում՝ Կանզասում, Միսուրիում, Արկանզասում և Տեխասում։ Գործում են  հեղեղումների մասին նախազգուշացումները:

Շաբաթ ուշ երեկոյան Օկլահոմայում տորնադոն անցել է մոտ 5000 բնակիչ ունեցող Հոլդենվիլ քաղաքով։ Հոլդենվիլը գտնվում է Օկլահոմա Սիթիից մոտավորապես 128,75 կմ հեռավորության վրա:

Նահանգապետ Քևին Սթիթը կիրակի արտակարգ դրություն է հայտարարել 12 շրջանում։  Արտակարգ ծառայությունների աշխատակիցները զբաղվել են փլատակները մաքրելով և ուժեղ փոթորիկների վնասը գնահատելով, որոնք վնասել են էլեկտրահաղորդման գծերը:

Կիրակի առավոտվա դրությամբ մոտ 33,000 բաժանորդ հոսանքազրկված է եղել, հայտնում է power outage.us-ը, որը հետևում է Օկլահոմայում էլեկտրաէներգիայի խափանումներին: Տեխասում գրեթե 67,000 բաժանորդ է մնացել առանց էլեկտրականության։