Ադրբեջանի վերադարձի հարցը չի քննարկվել ԵԽԽՎ-ում. դա հնարավոր կարող է լինել միայն այն պարագայում, երբ վերջինս կատարի այն պարտականությունները, որոնք նախատեսված են ընդունված համապատասխան բանաձեւում: Այս մասին, այսօր՝ ապրիլի 22-ին, Ազգային ժողովում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր, Պետական-իրավական հարցերի մշտական հանձնաժողովի նախագահ Վլադիմիր Վարդանյանը:
Նրա խոսքով, այդ պարտավորությունների կատարմանը զուգահեռ կարող են քննարկումներ լինել. «Ես չեմ բացառում հետագայում որեւէ քննարկում: Պետք է չմոռանանք, որ ԵԽԽՎ ցանկացած նոր նստաշրջան, որը մեկնարկում է յուրաքանչյուր տարվա հունվարին, ենթադրում է նոր պատվիրակության լիազորությունների հաստատում կամ չհաստատում: Կամ եթե լինեն արտահերթ ընտրություններ, ապա դրանից հետո նոր պատվիրակություն է ձեւավորվում, եւ այդ նոր պատվիրակության լիազորությունները եւս ենթակա են հաստատման»,-ասաց նա:
Վլադիմիր Վարդանյանին զարմացնում է, թե որտեղից են լրատվամիջոցները հղում անելով իրենց աղբյուրներին, գրում, թե ԵԽԽՎ-ում քննարկվում է Ադրբեջանի պատվիրակութան ԵԽԽՎ վերադարձի հարցը. «Եթե այդ աղբյուրները գտնեք, որոնք այդպես ակտիվ տարածում են այդ տեղեկությունները, լավ կլինի, որ մենք էլ իմանանք, հասկանանք, թե ով է փորձում ԵԽԽՎ-ի անունից նման հայտարարություններ անել»:
