Իրանի կողմից բալիստիկ հրթիռների փոխանցումը Ռուսաստան կհանգեցնի Յոթնյակի (G7) երկրների արագ և համակարգված արձագանքին։ Այս մասին ասված է G7 երկրների արտաքին գործերի գերատեսչությունների ղեկավարների ամփոփիչ համատեղ հայտարարության մեջ՝ Կապրի կղզում եռօրյա հանդիպման ավարտին։
«Մենք կոչ ենք անում Իրանին դադարեցնել աջակցությունն Ուկրաինայում Ռուսաստանի ռազմական գործողություններին։ Ռուսաստանին բալիստիկ հրթիռներ կամ հարակից տեխնոլոգիաներ փոխանցելու՝ Իրանի կողմից ցանկացած քայլ դե ֆակտո և զգալի էսկալացիա կլինի, որին կհաջորդի մեր արագ և համակարգված պատասխանը, ներառյալ՝ նոր և կոշտ միջոցներ Իրանի դեմ»,- ասվում է փաստաթղթում։
G7 երկրները նաև կոչ են արել ԿԺԴՀ-ին անհապաղ դադարեցնել Փհենյանի ենթադրյալ զենքի մատակարարումները Մոսկվա:
