Մեր մտահոգությունն այն է, որ Հայաստանն ու ողջ Կովկասը չվերածվեն աշխարհաքաղաքական մրցակցության դաշտի և որ Հայաստանի արտաքին հարաբերությունների զարգացումը տեղի չունենա այլ երկրների հաշվին։ Հայաստանի իշխանությունները մեզ հայտնեցին, որ արտաքին քաղաքականության դիվերսիֆիկացումն ուղղված չէ Իրանի հետ հարաբերությունների դեմ։ Այս մասին ապրիլի 16-ին լրագրողների հետ հանդիպման ժամանակ ասել է Հայաստանում Իրանի արտակարգ և լիազոր դեսպան Մեհդի Սոբհանին՝ պատասխանելով NEWS.am -ի թղթակցի՝ Եվրահանձնաժողովի ղեկավարի և ԱՄՆ պետքարտուղարի հետ Հայաստանի վարչապետի ապրիլի 5-ին Բրյուսելում կայացած հանդիպման մասին հարցին։
«Մենք լավ, ռազմավարական հարաբերություններ ենք հաստատել Հայաստանի հետ։ Մենք շարունակելու ենք այս ուղղությամբ, հարաբերությունների զարգացման ուղղությամբ»,- նշել է նա։
Մեհդի Սոբհանին հավելել է, որ Հայաստանի իշխանությունները իրանական կողմին ասել են, որ հանդիպումը բացառապես տնտեսական նպատակներով է եղել, և որ այն նպատակ է ունեցել նաև աջակցություն ստանալ Լեռնային Ղարաբաղի ժողովրդի համար։
«Հայաստանի իշխանությունները հայտնել են, որ այս հանդիպումն ուղղված չէ որևէ երրորդ երկրի դեմ։ Նրանք ասել են, որ հանդիպման նպատակը եղել է Հայաստանի տնտեսությունը հզորացնելը և Ղարաբաղից տեղահանվածների համար աջակցություն ստանալը։
Մենք դեմ չենք Հայաստանի իշխանությունների՝ տնտեսությունը զարգացնելու և Լեռնային Ղարաբաղից տեղահանվածների խնդիրները լուծելու ջանքերին։ Տնտեսական խնդիրների լուծման ուղիներ գտնելը Հայաստանի իրավունքն է»,- նշել է դեսպանը։
