Պատճառն ավելի խորն է, քան մեր հայրենակիցների անվտանգությունը, փորձ է արվում փոխել Երուսաղեմի ստատուս քվոն։ Այս մասին ապրիլի 11-ին լրագրողների հետ զրույցում ասաց Հայաստանի արտաքին գործերի փոխնախարար Վահան Կոստանյանը։
Նրա խոսքով, Հայաստանի ԱԳՆ-ն, շփվելով արաբական երկրների և այլ գործընկերների հետ, այդ թվում՝ բազմակողմ հարթակներում, բարձրացնում է խնդիրը։ «Գործընթացի սկզբից մենք տեղյակ էինք իրադարձությունների մասին։ Մենք ոչ մի վայրկյան չենք անտեսել խնդիրը»,- նշել է Կոստանյանը։
Հիշեցնենք, որ Հայոց պատրիարքարանը 99 տարով իսրայելական ընկերությանը վարձակալության է տվել Երուսաղեմի հայկական թաղամասի «Կովերի այգին», սակայն հետո հայտարարել է գործարքը խզելու իր որոշման մասին։ Սրանից հետո վերաբնակիչների և հայ համայնքի միջև իրավիճակը սրվեց, որը պարբերաբար վերաճեց բախումների։
