Սպիտակ տանը հայտնել են, որ Ներկայացուցիչների պալատի խոսնակ Մայք Ջոնսոնը պատրվակ է փնտրում, որպեսզի քվեարկության չդնի օրինագիծը, որը նախատեսում է օգնության տրամադրում Ուկրաինային։ Այս մասին ճեպազրույցում ասել է Սպիտակ տան մամուլի քարտուղար Քարին Ժան-Պիեռը։

Ժան-Պիեռին հարցրել են, թե դիտարկում են արդյոք Սպիտակ տանը Ուկրաինային միայն ռազմական օգնության մասին օրինագծի քվեարկությունը՝ առանց հումանիտար բաղադրիչի, ինչի մասին ավելի վաղ խոսում էր Ջոնսոնը։ Սպիտակ տան ներկայացուցիչը պատասխանել է, որ նախագիծն արդեն կունենա երկկուսակցական աջակցություն Պալատում, եթե դրվի քվեարկության։

«Ես կարծում եմ, որ այն, ինչ տեղի է ունենում, նշանակում է, որ խոսնակը պատրվակ է փնտրում , որն արդարացված չէ, որը պետք չէ։ Որովհետեւ մենք գիտենք, որ եթե նա նախագիծը քվեարկության դնի, այն կանցնի»,- ընդգծել է Ժան-Պիեռը։

Նա հիշեցրել է, որ Սենատը աջակցել է նախագծին երկկուսակցական ճնշող մեծամասնությամբ։

ԱՄՆ Կոնգրեսում անցած տարվա հոկտեմբերից չեն կարողանում հավանություն տալ Ուկրաինային աջակցության՝ ԱՄՆ նախագահ Ջո Բայդենի առաջարկած բազմամիլիարդանոց փաթեթին։