Սաուդյան Արաբիայում ստեղծել են առաջին մարդանման ռոբոտը՝ Սառա անունով, որը չգիտի խոսել սեքսի կամ քաղաքականության մասին, քանի որ սաուդցի կին է։

Էր Ռիադում տեղակայված QSS AI & Robots ընկերության գլխավոր տնօրեն Էլի Մետրին Business Insider պարբերականին ասել է, որ «Սառան գիտի, որ աղջիկ է, 25 տարեկան է, հասակը՝ 162 սանտիմետր եւ կրում է սաուդյան հագուստ»։

«Նա պետք է լինի քնքուշ, չխոսի քաղաքականության, սեքսի մասին, քանի որ մենք Սաուդյան Արաբիայում ենք։ Այդ թեմաները շոշափել պետք չէ»,- ասել է Մետրին։ Սառան կրում է ավանդական սաուդյան աբայա, առաջին մարդանման ռոբոտն է, որը ստեղծվել է Սաուդյան Արաբիայում եւ, գուցե, Մերձավոր Արեւելքում։

Նա տիրապետում է երկու լեզվի, խոսում է արաբերեն եւ անգլերեն։

Գլխավոր տնօրենի խոսքով՝ Սառան օգտագործում է ընկերության լեզվի ուսուցման սեփական մոդելը՝ արհեստական բանականության ծրագիրը, որը նախատեսված է տեքստը եւ խոսքը հասկանալու համար։

Սառան արժանացել է մեծ ուշադրության տարբեր ցուցահանդեսներում՝ ներկայացնելով Սաուդյան Արաբիայի ձեռքբերումները ռոբոտատեխնիկայի եւ արհեստական բանականության զարգացման ոլորտում։