Արեւմտյան երկրները զգուշանում են Ռուսաստանի հետ հարաբերությունների լրիվ խզումից, քանի որ չեն բացառում Ուկրաինայի պարտությունը, հայտնել է Ուկրաինայի նախագահ Վլադիմիր Զելենսկին։
«Բոլորը Ռուսաստանի հետ դուռը բաց են պահում։ Մի փոքր բաց։ Ոչ այնքան բաց, որքան կար 2014թ., երբ տեղի ունեցավ մեծ սխալը։ Բայց ղեկավարներից յուրաքանչյուրը դուռը մի փոքր բաց է պահել։ Ոչ բոլորը, բայց շատերը։ Պարզապես անցք։ «Իսկ ի՞նչ կլինի, եթե Ուկրաինան պարտվի։ Մենք չպետք է լրիվ փակենք դռները Ռուսաստանի առջեւ»,- ասել է Զելենսկին The New York Times-ի հարցազրույցում։
Նրա խոսքով՝ դա արտահայտվում է այն բանում, որ Արեւմուտքը չի համարձակվել լրիվ դադարեցնել առեւտուրը Ռուսաստանի հետ, հետ չի կանչել իր դեսպաններին եւ չի փակել դեսպանությունները, որպեսզի «չմնա առանց դիվանագիտական հարաբերությունների ՌԴ-ի հետ»։ Արեւմտյան երկրները նաեւ Ուկրաինային չեն հանձնել Ռուսաստանի սառեցված ակտիվները եւ թույլ չեն տալիս խփել արեւմտյան զենքով ռուսական տարածքին թեժացման ռիսկի պատճառով, որն «արդեն տեղի է ունեցել»։ «Մեկուսացումը չստացվեց»,- փաստել է Զելենսկին։
Կիեւը չի բացառում, որ բանակցությունները Մոսկվայի հետ կարող են վերսկսվել։ Սակայն դա տեղի կունենա միայն Շվեյցարիայի խաղաղության գագաթաժողովից հետո, որը նախատեսված է հունիսի կեսին, ընդգծել է Զելենսկին։ Նրա խոսքով՝ այդ միջոցառմանն Ուկրաինան մտադիր է ստանալ իր խաղաղ կարգավորման պլանի լայն աջակցություն։
«Եվ երբ նրանք տեսնեն, որ, օրինակ, 60, 80, 100 երկրներ կարծում են, որ սա արդարացի պլան է, դե ինչ, այդ ժամանակ էլ կտեսնենք՝ ցանկանո՞ւմ է արդյոք Ռուսաստանը վերջ դնել պատերազմին։ Եվ մենք կտեսնենք, թե ցանկանում է արդյոք խաղաղություն, որպեսզի պատերազմն ավարտվի արդարացի պայմաններով, այլ ոչ թե այն, ինչ մարդը տեսնում է Կրեմլում»,- ասել է Զելենսկին։