Լեհաստանում ձերբակալվել է ինը մարդու ռուսական հատուկ ծառայությունների պատվերով դիվերսիաներ կազմակերպելու մեղադրանքով։ Այս մասին TVN24 հեռուստաալիքի եթերում ասել է Լեհաստանի վարչապետ Դոնալդ Տուսկը, նրա խոսքերը մեջբերել է RMF24 ռադիոկայանը։
«Դրանք վերաբերում են ծեծերին, հրկիզումներին եւ հրկիզման փորձերին»,- ասել է Տուսկը։
Ըստ նրա՝ խոսքը վարձկանների մասին է, որոնց մի մասը «քրեական աշխարհի» մարդիկ են։ Նրանց մեջ կան Ուկրաինայի, Բելառուսի եւ Լեհաստանի քաղաքացիներ։
Որպես օրինակ Տուսկը նշել է Վրոցլավում ներկերի արտադրության գործարանը հրկիզելու փորձը։ Նա «անվիճելի» է անվանել, որ հրկիզումը պատվիրել են ռուսական հատուկ ծառայությունները։ Վարչապետն ավելացրել է, որ նման դիվերսիաներ կատարվում են Լիտվայում, Լատվիայում եւ Շվեդիայում։
Մինչ այդ Լեհաստանի նախագահ Անջեյ Դուդան հայտնել էր, որ վերջին օրերին երկրուն տեղի են ունեցել մի քանի լուրջ հրդեհներ, որոնց պատճառը, հավանաբար, հրկիզումներն էին։ Նրա կարծիքով՝ դա «կարող էր լինել Լեհաստանում իրավիճակի ապակայունացման փորձ»։
