Ղազախստանի համար կարևոր են Եվրասիական տնտեսական միությունում Հայաստանի նախագահության առաջնահերթությունները, մասնավորապես թվայնացման և պարենային անվտանգության հարցերում։ Այս մասին հայտարարել է Հայաստանում Ղազախստանի դեսպան Բոլատ Իմանբաևը Եվրասիական փորձագիտական ակումբի տարեկան հանդիպման շրջանակում «Հայաստանը ԵԱՏՄ-ում. Եվրասիական տնտեսական ինտեգրման իրողություններն ու հեռանկարները» համաժողովում։
Դեսպանի խոսքով, վերջերս Մոսկվայում կայացած Եվրասիական տնտեսական բարձրագույն խորհրդի նիստում Ղազախստանի նախագահ Կասիմ-Ժոմարտ Տոկաևը խոսել է Եվրասիական տնտեսական միության առանց խոչընդոտների շուկայի կառուցման կարևորության մասին։ Այս ճանապարհին թաքնված սահմանափակումների վերացումը ԵԱՏՄ-ի բացարձակ առաջնահերթությունն է, նշել է դեսպանը։ Այս առումով շատ կարևոր են հայկական կողմի նշած թվային լուծումների կիրառման առաջնահերթությունները։
Խոսելով երրորդ երկրների հետ ԵԱՏՄ-ի լոգիստիկ կապերի ընդլայնման մասին՝ Իմանբաևը ուշադրություն է հրավիրել այն փաստի վրա, որ Ղազախստանն արդեն ակտիվացրել է բեռների տերմինալը չինական Սիան քաղաքում։ Այստեղ, նշել է դեսպանը, պետք է ձևավորվի Չինաստան-Եվրոպա երթուղու կոնտեյներային փոխադրումների ծավալի մինչև 40%-ը։ Ղազախստանի սահմաններում ձևավորվում են նաև լոգիստիկ տերմինալներ՝ ապրանքների տարանցումը պարզեցնելու նպատակով։
Շատ կարևոր են նաև արդյունաբերական համագործակցության նախագծերը, որոնք այս տարվանից կսուբսիդավորվեն Եվրասիական տնտեսական հանձնաժողովի բյուջեից, նշեց դեսպանը։ Նրա խոսքով, ներկայումս Ղազախստանն աշխատում է ավելի քան 150 նման նախագծերի վրա՝ Եվրասիական միության այլ երկրների ձեռնարկությունների հնարավոր մասնակցությամբ։
Ընդհանուր առմամբ, Իմանբաևը նշել է, որ 2014 թվականից ի վեր ԵԱՏՄ երկրների հետ Ղազախստանի ապրանքաշրջանառությունն աճել է 1,7 անգամ՝ մինչև 2023 թվականի վերջ հասնելով 28,5 միլիարդ դոլարի։
