«Մի քանի օր առաջ ասացի, որ ինձ համար դժվար կլինի որոշակիացնել այդ սուբյեկտները, և չեմ կարող այսօր փոխել դիրքորոշումս։ Այդ սուբյեկտների հստակեցումը բացասաբար կազդի մեր ազգային անվտանգության շահերի վրա, տվյալ դեպքում նկատի չունեմ ԵՄ-ն ու ԱՄՆ-ն։ Ընդհակառակը, հիմնական զոհը Եվրամիությունն է»։ Ըստ վրացական Առաջին ալիքի՝ դրա մասին հայտարարել է Վրաստանի վարչապետ Իրակլի Կոբախիձեն՝ պատասխանելով լրագրողների հարցին, թե ում նկատի ունի «Գլոբալ պատերազմի կուսակցություն» ասելով։
Կոբախիձեն նշել է, որ իր համար դժվար կլինի կոնկրետ անձանց անուններ տալ։ Նրա համոզմամբ՝ «Գլոբալ պատերազմի կուսակցությունը» վճռորոշ, քննադատական ազդեցություն ունի ինչպես Միացյալ Նահանգների, այնպես էլ Եվրամիության պաշտոնական կառույցների վրա, ինչը շատ ցավալի է: Հատկապես հեշտ է ազդել ԵՄ կառույցների վրա, քանի որ ԵՄ-ում որոշումներն ընդունվում են լիակատար կոնսենսուսով։
«Հետևաբար, բավական է, որ «Գլոբալ պատերազմի կուսակցությունը» ազդի գոնե մեկ երկրի վրա, այնուհետև կընդունի իր շահերից բխող որոշումը։ Ազդեցությունների մասշտաբները շատ մեծ են, և դրանք լուրջ ազդեցություն են ունենում պաշտոնական կառույցների վրա։ Ես իսկապես հույս ունեմ, որ ապագայում իրավիճակը որակապես կփոխվի, որից հետո և՛ Միացյալ Նահանգները, և՛ Եվրամիությունը «Գլոբալ պատերազմի կուսակցության» ազդեցությունից կազատվեն»,- եզրափակել է Կոբախիձեն։
