Մեր ճանապարհը տանում է միայն դեպի Եվրամիություն, եւ մեր գլխավոր արտաքին քաղաքական գերակայությունը Եվրամիությանն անդամակցությունն է, հայտնել է Վրաստանի վարչապետ Իրակլի Կոբախիձեն Եվրոպայի օրվան նվիրված միջոցառման ժամանակ, տեղեկացրել է վրացական Առաջին ալիքը։

Կոբախիձեի խոսքով՝ կառավարությունը ցանկանում է ստանալ զարգացման եւ բարգավաճման նույնպիսի մակարդակ, ինչպիսին Եվրամիությունում է։

«Այսօր մենք նշում ենք շատ կարեւոր օր՝ Եվրոպայի օրը։ 1950թ. մայիսի 9-ին հիմնվեց Եվրոպական միությունը, երբ ստորագրվեց Շումանի պայմանագիրը, եւ հենց այստեղ է սկսվում Եվրամիության եւ ընդհանուր առմամբ Եվրոպայի զարգացման ոսկե դարը, որը շարունակվում է մոտ 60 տարի։

Հենց այդ պահից այնպիսի արժեքներ, ինչպիսին են օրենքի գերակայությունը, ժողովրդավարությունը, մարդու իրավունքները, սոցիալական պետությունը, անշրջելիորեն հաստատվեցին Եվրոպայում՝ դնելով Եվրոպայում շարունակական խաղաղության հիմքը, ինչը ստեղծել է ամուր երաշխիքներ բարեկեցության մակարդակի մշտական բարձրացման համար Եվրամիությունում եւ ընդհանրապես Եվրոպայում։

Ես հիշում եմ այն երեք տարիները, որոնք անցկացրել եմ Դյուսելդորֆում, Եվրոպայի սրտում։ Հիշում եմ առաջին տպավորություններս, որոնք առաջին ձեռքից ստացա այն ժամանակ եվրոպական մշակույթի որակի եւ բարեկեցության մասին։ Դա շատ մեծ տպավորություն է, եւ մենք ցանկանում ենք հասնել զարգացման եւ բարեկեցության հենց այդ մակարդակին նաեւ Վրաստանում։

Ուստի, բնականաբար, մեր ճանապարհը տանում է միայն դեպի Եվրամիություն, եւ մեր գլխավոր արտաքին քաղաքական գերակայությունը Եվրամիությանն անդամակցությունն  է։ Ես համոզված եմ, որ տնտեսական կամ արժեքային խնդիրները, որոնք այսօր կանգնած են Եվրամիության առջեւ, կրում են ժամանակավոր բնույթ, եւ մեր պարտականությունն է մեծ եվրոպացիների առջեւ, որպեսզի մեզանից յուրաքանչյուրը նպաստի Եվրամիության վերածնմանը այն տեսքով, որով նա հիմնվել է 1950թ. մայիսի 9-ին եվրոպացի մեծ գործիչների կողմից, ինչպիսին են Ռոբերտ Շումանը, Ժան Մոնեն, Կոնրադ Ադենաուերը, Ուինսթոն Չերչիլը եւ այլք։ Մենք պետք է գործենք այս պատասխանատվությամբ»,- ասել է Իրակլի Կոբախիձեն։