Հայաստանը պետք է որոշի՝ շարունակո՞ւմ է միակողմանի զիջումների քաղաքականությունը, թե՞ գծում կարմիր գծեր, որոնք հնարավոր չէ անցնել, թե ոչ. բոլորս էլ հասկանում ենք, որ Տավուշի իրադարձություններին հաջորդելու են այլ պահանջներ, այդ թվում՝ այսպես կոչված «Զանգեզուրի միջանցքը»։ NEWS.am-ի «ՈւԺԻ ԳՈՐԾՈՆ» հաղորդման եթերում նման տեսակետ է հայտնել ՀՀ նախկին արտգործնախարար Արա Այվազյանը։
«Հիմա խոսում են «Խաղաղության խաչմերուկի» մասին։ Ներքին կասկած ունեմ, որ ինչ-որ պահի այն կարող է Հայաստանում կոչվել «Խաղաղության խաչմերուկ», Ադրբեջանում՝ «Զանգեզուրի միջանցք», Ռուսաստանում՝ հաղորդակցությունների ապաշրջափակում: Արդյունքում բոլորը կարող են շահել, բացի Հայաստանից»,- նշեց նախկին արտգործնախարարը։
Այվազյանը հիշեցրեց, որ նոյեմբերի 9-ի հայտարարությունը, որի 9-րդ կետը վկայակոչում է Ալիեւը, ուժը կորցրել է՝ հաշվի առնելով մնացած կետերի խախտումները։
«Հայկական դիվանագիտությունը պետք է հմտորեն առաջ տանի այդ օրակարգը և ստանա այն երկրների աջակցությունը, որոնք մտահոգված են այսպես կոչված «Զանգեզուրի միջանցքի» հնարավոր բացմամբ, որը հանդիսանում է Թուրանի միջանցքը։ Թուրքիայի և Ադրբեջանի դերը պետք է մտահոգի Իրանին, Ռուսաստանին և Չինաստանին»,- հավելեց նախկին արտգործնախարարը։
Միաժամանակ, Այվազյանի համոզմամբ, Արևմուտքը ցանկանում է այնպես անել, որ կարևորագույն հաղորդակցությունները շրջանցեն Ռուսաստանը, ինչպես նաև Չինաստանն ու Իրանը։
«Վերջին 2-3 տարիների իրադարձությունները ցույց տվեցին, որ չնայած Հայաստանի վարած քաղաքականությանը, որն ուղեկցվում է զիջումների գնալով, կան ուժեր, որոնք զսպում են Ադրբեջանի ծավալապաշտական քաղաքականությունը, բայց Հայաստանն ինքը պետք է որոշի, թե ինչ քաղաքականություն է վարում։ Երեւանը պետք է վարի Բաքվի ծավալապաշտությունը զսպելու քաղաքականություն: Այս դեպքում կլինեն ուժեր, որոնք կաջակցեն այս նախաձեռնությանը։ Եթե Հայաստանը դիվանագիտական դիմադրություն ցույց տա, ապա կգտնվեն երկրներ, որոնք կմիանան այս քաղաքականությանը»,- եզրափակեց Այվազյանը։
