ՌԴ պաշտպանության նախարարությունը հաստատել է, որ չորեքշաբթի գիշեր ռուս զինվորականները զանգվածային հարված են հասցրել ուկրաինական էներգետիկ օբյեկտներին։
ՊՆ հաղորդագրությունում ասված է, որ հարվածը հասցվել է «ծովային եւ օդային բազավորման մեծ հեռահարության գերճշգրիտ զենքով, աերոբալիստիկ հիպերձայնային «Կինժալ» հրթիռային համալիրով, ինչպես նաեւ անօդաչու թռչող սարքերով էներգետիկայի օբյեկտներին, ինչպես նաեւ Ուկրաինայի ռազմարդյունաբերական համալիրի ձեռնարկություններին»։
«Հարվածի թիրախները խոցված են։ Նշված բոլոր օբյեկտները խոցվել են»,- նշել են ՌԴ ՊՆ-ում։
Ուկրաինայի ԶՈւ օդուժը տեղեկացրել է, որ մայիսի 8-ի գիշերը Ռուսաստանը տարբեր տեսակի հրթիռներով եւ հարվածային անօդաչուներով հարված է հասցրել՝ կիրառելով 55 հրթիռ եւ 21 կամիկաձե դրոն։ Ուկրաինացի զինվորականների հայտարարության համաձայն՝ հաջողվել է խփել 39 հրթիռ եւ 20 դրոն։
Ուկրաինայի իշխանությունները հաղորդել են վեց մարզերում էներգետիկ օբյեկտներին հասցված հարվածների մասին, այդ թվում վնասվել է երեք էլեկտրակայան։
Ռուսաստանի պաշտպանության նախարարությունը հաստատում է, որ այսօրվա հարվածը հասցվել է «ի պատասխան Կիեւի ռեժիմի՝ ռուսական էներգետիկայի օբյեկտներին վնաս պատճառելու փորձի»։
Սակայն ռուս զինվորականները ուկրաինական էներգետիկ ենթակառուցվածքի զանգվածային գնդակոծություններն սկսել են դեռ 2022թ. աշնանը, մինչ ուկրաինական դրոններն սկսել են գրոհել ռուսական նավթագազային օբյեկտները (դա տեղի է ունեցել 2024թ. ձմռանը եւ գարնանը)։