Ազգայնական շարժում կուսակցության ղեկավար Դեւլեթ Բահչելին հայտնել է, որ Իսրայելի վարչապետ Բենիամին Նեթանյահուն խափանում է Գազայում հրադադարի բանակցությունները եւ պետք է վճարի դրա համար։ Նա այդ մասին հայտնել է խորհրդարանում ելույթի ժամանակ։
«Նեթանյահուի եւ նրա վարչակազմի փոխհատուցման ժամանակը մոտ է։ Նրանք չեն փրկվի դրանից եւ չեն փախչի։ Հուսով եմ, որ 35 հազար անմեղ մարդկանց թափված արյունը կխեղդի Նեթանյահուին։ Նա չի դադարում սպառնալ Ռաֆահին եւ դրանով իսկ խափանում է Կահիրեի բանակցությունները։ Մարդկայնորեն եւ իրավաբանորեն նա պետք է վճարի դրա համար»,- ասել է նա։ ԱՇԿ-ն Էրդողանի կառավարող Արդարություն եւ զարգացում կուսակցության դաշնակիցն է։
Բահչելին հիշեցրել է, որ Իսրայելի գործողությունները Գազայում «բողոքներ են առաջացրել շատ երկրներում, հատկապես Գերմանիայում, Ֆրանսիայում, Կուբայում, Կանադայում եւ ԱՄՆ-ում»։ «Շատ երկրներում բողոքի են դուրս եկել համալսարանների ուսանողները։ ՄԱԿ-ը պետք է միջամտի որքան հնարավոր է շուտ»,- նշել է նա։
