ԱՄՆ նախկին նախագահ Դոնալդ Թրամփը ներկայիս նախագահ Ջո Բայդենի վարչակազմը համեմատել է նացիստական Գերմանիայի գաղտնի ոստիկանության՝ գեստապոյի հետ՝ շաբաթ օրը ելույթ ունենալով Մար-ա-Լագոյի իր ակումբում, որտեղ հարյուրավոր դոնորներ էին հավաքվել հանրապետական ազգային կոմիտեի գարնանային հանդիպմանը, հայտնում է NBC News-ը։
Նա այս հայտարարությունն արել է՝ մեկնաբանելով օրենքի հետ կապված իր խնդիրները։
«Այս մարդիկ ղեկավարում են գեստապոյի վարչակազմը,- ասել է Թրամփը՝ NBC News-ի ձեռք բերած ընթրիքի ձայնագրության համաձայն:- Եվ դա միակ բանն է, որ ունեն։ Եվ, նրանց կարծիքով, սա հաղթելու միակ միջոցն է»։
«Հենց ինձ մեղադրանք առաջադրեցին, ես ասացի, որ ձեռնոցները հանելու ժամանակն է», - հավելել է Թրամփը՝ Բայդենին անվանելով «երկրի պատմության մեջ ամենավատ նախագահը»:
«Նա բացարձակապես ապաշնորհ է։ Սարսափելի խաբեբա։ Նա Մանջուրիայի թեկնածու է, հսկայական գումարներ է ստանում Չինաստանից, Ռուսաստանից, Ուկրաինայից և շատ այլ երկրներից։ Նա խարդախ է»,- ասել է ԱՄՆ նախկին նախագահը։
Թրամփը նաև ասել է, որ թույլ չի տալիս, որ իր իրավական խնդիրները շատ անհանգստացնեն իրեն։
«Եթե չափից շատ ես անհանգստանում, որպես կանոն, շնչահեղձ ես լինում: Եվ, ինչ-որ առումով, ինձ համար միևնույնն է։ Պարզապես, գիտեք ինչ, կյանքը կյանք է»,- ասել է նա:
Միաժամանակ նա խոստովանել է, որ զարմացել է, երբ իրեն մեղադրանք են առաջադրել։
Նա նաև Ջեք Սմիթին՝ Թրամփի դեմ երկու դաշնային գործեր հարուցող հատուկ դատախազին, «ոխակալ ստահակ» և «անմեղսունակ» է անվանել։