Իրանի Իսլամական հեղափոխության պահապանների կորպուսի օդատիեզերական ստորաբաժանման հրամանատար, բրիգադի գեներալ Ամիր Ալի Հաջիզադեն հայտարարել է, որ Իրանն անցյալ ամիս Իսրայելի դեմ պատասխան օդային հարվածներ հասցնելիս օգտագործել է իրեն հասանելի ռազմական ռեսուրսների միայն մի փոքր մասը:
Ըստ Mehr գործակալության՝ իրանցի գեներալը շեշտել է, որ Իրանի պատժիչ հարվածների՝ «Ճշմարիտ խոստում» անվամբ գործողություն ժամանակ Իսրայելին օգնության են հասել Միացյալ Նահանգները, Մեծ Բրիտանիան և Ֆրանսիան՝ փորձելով հետ մղել Իրանի հարձակումները։
Հաջիզադեն հավելել է, որ հակազդելով գերտերություններին և նրանց դաշնակիցներին՝ Իրանն Իսրայելի վրա ավիահարվածների ժամանակ օգտագործել է իր ռեսուրսների միայն 20%-ը:
Ըստ Հաջիզադեի՝ Իսրայելը Իրանի հարձակումներին հակազդելու համար մոբիլիզացրել է իր բոլոր ռազմական ռեսուրսները, միաժամանակ ԱՄՆ-ն, ի աջակցություն Իսրայելի, գործի է դրել իր ինքնաթիռները, հածանավերը և ավիակիրները։
Գեներալը նշել է, որ թեև Իրանը չօգտագործեց իր ամբողջ հզորությունը, Իսրայելը և նրա դաշնակիցներն Իրանին դիմակայելու համար օգտագործեցին այն ամենը, ինչ ունեին: Իրանցի գեներալը հավելել է, որ ԱՄՆ-ը, որը նախկինում հայտարարել էր, թե միջամտելու մտադրություն չունի, աջակցում է Իսրայելին: