«Մայիսին Վրաստանի խորհրդարանի շենքի վրա բողոքի ցույցի մասնակիցների հարձակման հետեւանքով խորհրդարանի շենքին եւ ենթակառուցվածքին վնաս է հասցվել, ուստի այսօր՝ մայիսի 2-ին նախատեսված միջոցառումները (բյուրոն եւ լիագումար նիստերը) տեղի չեն ունենա»,- այսպիսի տեղեկություն է տարածել խորհդարանի մամուլի կենտրոնը, տեղեկացրել է SOVA-ն։
Տարածված տեղեկության մեջ նշված է, որ օրենսդիր մարմնի տարածքում մաքրման եւ վերականգնման աշխատանքներ են կատարվում, իսկ շենքում մտցվել է անվտանգության կարմիր մակարդակ, դրա գործողության ժամանակ «ոչ ոքի չի թույլատրվում մտնել խորհրդարան, բացի այն անձանցից, որոնց սահմանում է խորհրդարանի աշխատակազմի ղեկավարը։»։
Այսօրվա լիագումար նիստի չեղարկման հետեւանքով հետաձգվել է արտաքին գործերի նախարար Իլյա Դարչիաշվիլու ելույթը։ Նա խորհրդարան էր հրավիրվել «Նախարարի ժամ» ձեւաչափով։
Հիշեցնենք, որ մայիսի 1-ին խորհրդարանի պատգամավորները 83 ձայնով երկրորդ ընթերցմամբ ընդունել են «օտարերկրյա ազդեցության թափանցիկության մասին» օրինագիծը։
Ցույցերի ցրման ընթացքում, որոնք տեղի էին ունենում Թբիլիսիում, իրավապահ մարմիններն օգտագործել են հատուկ միջոցներ՝ ջրցաններ, պղպեղի սփրեյներ, արցունքաբեր գազ։ Ցուցարարները պնդում են, որ հատուկջոկատայիններն օգտագործել են նաեւ ռետինե փամփուշտներ, բայց ՆԳՆ-ում այս տեղեկությունը չեն հաստատում։